Ադրբեջանի պատվիրակության մանդատի մեկ տարով կասեցումից հետո Իլհամ Ալիեւի արտաքին քաղաքական հարցերով օգնական Հաջիեւը Բաքվում շուտափույթ հանդիպման հրավեր է արել ԵԽԽՎ-ում թուրքական պատվիրակության ղեկավար, նախկին արտգործնախարար Չավուշօղլունի: Բաքու է գործուղվել, սակայն, Ազգային մեծ ժողովի անվտանգության եւ պաշտպանության հարցերով կոմիտեի ղեկավար, պաշտպանության նախկին նախարար Աքարը:
Տեղի է ունեցել նրա գլխավորած պատվիրակության հանդիպումն Իլհամ Ալիեւի հետ, ինչը նշանակում է, որ նա Բաքվում է որպես Թուրքիայի նախագահի հատուկ բանագնաց: Ըստ ադրբեջանական լրատվամիջոցների, կարեւորվել է «պրոֆիլային հանձնաժողովների մակարդակով թուրքախոս պետությունների միջխորհրդարանական համագործակցությունը»: Ընդգծվել է Շուշիի հռչակագրի նշանակությունը: Ալիեւը խոսել է Ադրբեջանի զինված ուժերում բարեփոխումների մասին, երկուստեք գոհունակություն են հայտնել համատեղ զորավարժությունների անցկացման առթիվ:
Հայտնի է դարձել, որ Եվրամիությունը մտադիր է մեկուկես միլիարդ եվրո հատկացնել՝ արդիականացնելու Կենտրոնական Ասիայից Եվրոպա ապրանքաշրջանառության ենթակառացվածքները, այդ թվում՝ ղազախական Ակթաու, թուրքմենական Թուրքմենբաշի եւ Բաքվի նավահանգիստները: Տեղեկություն կա, որ Չինաստանը «տիրանում է» վրացական Անակլիա նավահանգստին: Եթե Եվրամիության եւ Չինաստանի նախագծերը կյանքի կոչվեն, ապա Թուրքիան շատ զգալի մասով դուրս կմնա Չինաստան-Կենտրոնական Ասիա-Եվրամիություն երկրներ ապրանքաշրջանառության լոգիստիկայից:
Ադրբեջանը «Հյուսիս-հարավ» տրանսպորտային միջանցքի տրանզիտի հարցում Մոսկվայի հետ քննարկումների մեջ է: Եթե Ադրբեջանը վերածվում է հյուսիս-հարավ եւ արեւելք-արեւմուտք հաղորդակցության խաչմերուկի, ապա «թուրքական աշխարհ» պրոյեկտը կորցնում է աշխարհաքաղաքական կարեւորությունը, որովհետեւ Ադրբեջանը փաստացի դադարում է կապող օղակ լինել Անատոլիայի եւ պատմական Թուրքեստանի միջեւ:
Ալիեւին նվիրած Էրդողանի կացինը, որ հանդիպման ավարտին փոխանցել է Հուլուսի Աքարը, իհարկե, առաջին ասոցացիայով ընկալվում է որպես «Հայաստանի վիզը հատելու» զենք: Ոչ ոք այդ սիմվոլիկան չի կարող անտեսել եւ չպետք է անտեսի: Այդուհանդերձ, ինչպես հայտնի ֆիլմում է ասվում՝ Восток –дело тонкое: Թուրքիան փորձում է Արեւմուտքի հետ հարաբերությունների նոր դարաշրջան սկսել:
Ալիեւն առերեւույթ սրում է Եվրոպայի եւ եվրոպական կառույցների հետ դիմակայությունը: ԱԺՃ առաջնորդ Քերիմլիի գնահատմամբ՝ «բացառված չէ, որ դա տակտիկական քայլ է, Ալիեւն Արեւմուտքին սպառնում է անդամակցել Ռուսաստանի, Բելառուսի, Իրանի եւ Հյուսիսային Կորեայի ակումբին»:
Նպատակը, ըստ Քերիմլիի, այն է, որ «Եվրոպան տեղի տա Լեռնային Ղարաբաղի հայ բնակչության անվտանգության եւ իրավունքների հարցում»: Փորձագետ Վելիզադեն Независимая газета-ին ասել է, որ Բաքուն արեւմտյան հարթակներում բանակցությունների չի գնում, որովհետեւ այնտեղ «Ադրբեջանի նկատմամբ միակողմանի ճնշումներ կան»: Նա գտնում է, որ Վաշինգտոնը եւ Բրյուսելը ձգտում են «Հարավային Կովկասից դուրս մղել Ռուսաստանին»: Թուրքիան Հարավային Կովկասում է, բայց շարունակում է մնալ Ռուսաստանի հե՞տ, թե փորձում լեգիտիմանալ Արեւմուտքի օգնությա՞մբ: Ալիեւը լիովին Թուրքիայի հե՞տ է, թե՝ Ռուսաստանի՞:
