ԱԺ փոխնախագահ Հակոբ Արշակյանը Հայաստանում անցկացվող Արհեստական բանականության թեմայով համաժողովին ներկաների առաջ ելույթում խորհուրդ է տվել կարդալ Սիներջի ընկերության հիմնադիր եւ տնօրեն Աշոտ Հովհաննիսյանի գիրքը, որը դեռեւս խորհրդային տարիներից Հայաստանի թվայնացման գործընթացի եւ հաջողությունների մասին է: Ըստ ԱԺ փոխնախագահի, այդ հաջողություններում մեծ ներդրում ունի հենց Աշոտ Հովհաննիսյանը, որին ծափահարելու կոչով նա դիմել է ներկաներին: Առաջին հայացքից համաժողովի սովորական ելույթ, բայց ամեն ինչ հայտնվում է այլ լույսի ներքո, եթե հիշում ենք, որ Աշոտ Հովհաննիսյանը նախօրեին կալանավորվել է երկու ամսով՝ էկոնոմիկայի նախարարությունում եւ հարակից մի շարք տեղերում իրավապահների կատարած խոշոր գործողությունից հետո, որն ըստ պաշտոնական հաղորդագրությունների՝ կոռուպցիայի դեմ է:
Ահա, Աշոտ Հովհաննիսյանի կալանավորման ֆոնին, ԱԺ փոխնախագահի ելույթն ու ծափահարելու կոչը այլ բան չէ, քան որոշակի «ապստամբություն» իրավապահների որոշման դեմ: Եվ այստեղ հարց կառաջանա, թե արդյո՞ք իրավապահների այդ որոշումները կարող էին կայացվել առանց վարչապետ Նիկոլ Փաշինյանի հետ համաձայնեցնելու, հաշվի առնելով գործի մասշտաբն ու աղմկոտ լինելու հանգամանքները: Հատկապես, եթե հիշենք, որ նույն գործի շրջանակում կալանավորվեց նաեւ ԱԺ նախագահի եղբոր կինը, որը դարձյալ Սիներջիի աշխատակից է: ԱԺ նախագահը նախօրեին իր ֆեյսբուքյան օգտահաշվի գլխավոր նկար էր հրապարակել եղբոր ու նրա կնոջ հետ թեւանցուկ լուսանկարը: Մի կողմից այդ հանգամանքը միանգամայն հասկանալի է մարդկային առումով, որպես բարդ վիճակում գտնվող հարազատի աջակցություն, մյուս կողմից այդ լուսանկարն էլ իր հերթին թողնում է ԱԺ նախագահի «ընդվզման» տպավորություն՝ իրավապահների կայացրած որոշման դեմ, եւ դարձյալ այն հարցի պարագայում, թե նրանք կարո՞ղ էին գնալ այդպիսի աղմկոտ քայլերի՝ ԱԺ նախագահի եղբոր կնոջ ձերբակալման, չունենալով քաղաքական առաջին դեմքի համաձայնությունը:
Ինչպես առիթ եմ ունեցել անդրադառնալ, խոշոր գործը իրավական ասպեկտին զուգահեռ, անկասկած ունի քաղաքական տողատակեր եւ դրանք զգալիորեն առնչվում են ներթիմային «ոչ խաղաղ արշալույսներին»: ԱԺ նախագահի, ԱԺ փոխնախագահի անդրադարձերը ըստ էության հաստատում են այդ հանգամանքը: Որքա՞ն խորն են ներթիմային բաժանարար գծերը: Դա գնահատելու համար պետք է տիրապետել ՔՊ, եւ ընդհանրապես կառավարող համակարգի խոհանոցին: Մենք թերեւս կարող ենք դատել միայն առերեւույթ դրսեւորումներով, որոնք աստիճանաբար դառնում են առավել խոսուն:
