Ադրբեջանի նախագահ Իլհամ Ալիևն անդրադարձել է հայ-ադրբեջանական խաղաղության բանակցություններին և Հայաստանի սահմանադրական փոփոխություններին․
«Ադրբեջանի և Հայաստանի միջև արդեն իսկ դե ֆակտո խաղաղություն է, երկու երկրների սահմանին արդեն մի քանի ամիս է խաղաղ իրավիճակ է։ Խաղաղության կարելի է հասնել, եթե փոփոխություններ կատարվեն Հայաստանի սահմանադրության մեջ և այլ փաստաթղթերում։ Ֆրանսիան, տարածաշրջանում ապակառուցողական քաղաքականություն վարելով, գործում է կրակի վրա բենզին լցնելու սկզբունքով», – հայտարարել է Ալիևը։
Ալիևը նաև հայտարարել է, որ Հայաստանի այլ նորմատիվ իրավական փաստաթղթերում ևս կան բազմաթիվ վերապահումներ Ադրբեջանի նկատմամբ տարածքային պահանջների վերաբերյալ, բազմաթիվ կոնվենցիաներում և այլ փաստաթղթեր կան, որոնք չեն ճանաչում Ադրբեջանի գերիշխանությունը Ղարաբաղի նկատմամբ։ Ալիևը նշել է, որ միջազգային ատյաններում Հայաստանի հայցերն՝ ընդդեմ Ադրբեջանի, հիմնված են այնպիսի հարցերի վրա, ինչպիսիք են Հայաստանի կողմից Ադրբեջանի ինքնիշխանությունն ու տարածքային ամբողջականությունը չճանաչելը, Ղարաբաղի անջատումն Ադրբեջանից։
Ըստ Ալիևի՝ խաղաղության կարելի է հասնել, եթե վերջ դրվի այդ պնդումներին, փոփոխություններ կատարվեն Հայաստանի սահմանադրության մեջ և այլ նորմատիվ իրավական փաստաթղթերում։ Ալիևը հույս է հայտնել, որ դրանք հնարավորինս շուտ կիրականացվեն Հայաստանում։ Ըստ Ալիևի՝ այս թեմայով ներքաղաքական քննարկումների նախաձեռնումը Հայաստանում դրական քայլ է և կարող է լավ հնարավորություն ստեղծել խաղաղության գործընթացի ավարտի համար։
