Այսօր հայ-ադրբեջանական սահմանի Տավուշի հատվածում տեղի կունենա Հայաստանի եւ Ադրբեջանի փոխվարչապօետների գլխավորած սահմանազատման եւ սահմանագծման հանձնաժողովների հանդիպումը: Ինչպես ավելի վաղ հայտարարել էր հայկական կողմը, հանդիպմանը կքննարկվի աշխատանքային կանոնակարգի, աշխատանքի կազմակերպմանն առնչվող հարցերի շրջանակ: Միաժամանակ, ադրբեջանական կողմը ընդհուպ Ալիեւի մակարդակով հայտարարել է, թե քննարկվելու է այսպես կոչված «ադրբեջանական գյուղերի» հարցը, որոնք «պահանջում» է Բաքուն: Հնարավոր է իհարկե, որ Ադրբեջանը առաջիկա օրերին այդ հարցը բարձրաձայնի ավելի ու ավելի ուժեղ, քանի որ առջեւում Ալիեւի արտահերթ ընտրության քվեարկությունն է եւ նա կփորձի նաեւ այդ հանգամանքով հավաքել որքան հնարավոր է ձայն:
Սակայն անկասկած է նաեւ, որ Բաքվի այդ տոնայնությունը կամ հռետորաբանությունը ամենեւին պայմանավորված չէ լոկ նախընտրական հանգամանքով եւ մտածել, թե այդ հանդիպումից հետո Ադրբեջանը հրաժարվելու է տվյալ օրակարգից, կլինի միամտություն՝ վտանգավոր մոլորություն: Այդ առնչությամբ սակայն թերեւս ոչ ոք մոլորության մեջ չէ, անգամ պաշտոնական Երեւանը, որը թվում է թե ինչ որ նաիվությամբ հավատում է խաղաղության օրակարգի մասին իր իսկ շեշտադրումներին ու ակնկալիքներին: Ավելին, դրանք գուցե բխում են հենց այն հանգամանքից, որ չկան Ալիեւի առնչությամբ պատրանքներ:
Այդ իմաստով, հատկանշական է, որ սահմանային հերթական հանդիպումից առաջ Երեւան է այցելել Իրանի հոգեւոր առաջնորդի խորհրդական, ասել է թե պետության բարձրագույն իշխանության ներկայացուցիչ, արտաքին հարցերի ռազմավարական խորհրդի անդամ Քամալ Խարազին: Երեւանում նա հանդիպել է քաղաքական ղեկավարության, ընդհուպ վարչապետ Փաշինյանի հետ: Ասել, որ նա այցելել է հենց սահմանազատման հարցերով հանձնաժողովի հերթական հանդիպման այսպես ասած շեմի նպատակով, թերեւս չափազանցություն է: Ինչպես արդեն իսկ առիթ եմ ունեցել նշելու, հատկանշական է, որ Իրանի բարձրագույն իշխանության ներկայացուցիչը Հայաստան է այցելել Ադրբեջանի հանդեպ այսպես ասած բարի կամքի, վստահության ուղղված »այն քայլերից հետո, որ բարձրաձայնեց Երեւանը «միակողմանիորեն», եւ Թեհրանը թերեւս դրանց առնչությամբ տեսավ առաջին ձեռքից իրազեկվելու անհրաժեշտություն՝ պատճառների, մոտիվների եւ բուն էության մասին: Իրանցի պաշտոնյան Հայաստանում փորձագիտական շրջանակի ներկայացուցիչների հետ հանդիպմանը շեշտել է ռեգիոնում սահմանների փոփոխության անթույլատրելիությունը: Մանրամասն առումով դժվար է ասել, թե ինչ խոսակցություն է եղել Երեւանում պաշտոնական հանդիպումներում, քանի որ դրանց վերաբերյալ տարածված հաղորդագրությունները խիստ ստանդարտ են, այդուհանդերձ հանգամանքը, որ Երեւան-Թեհրան այդ շփումը նախորդում է Տավուշի եւ Ղազախի շրջանի սահմանին հունվարի 29-ին տեղի ունենալիք հանդիպմանը, թույլ է տալիս ակնկալել, որ Հայաստանն այդ հանդիպման է մեկնում անուղղակի, բայց օգտակար «ուղեկցով»:
