ՀՀ փոխվարչապետ, տարածքային կառավարման նախարար Արմեն Գևորգյանն այսօր Արմավիրի մարզում ծանոթացել է «Հազարամյակի մարտահրավեր հիմնադրամ- Հայաստան» ծրագրով ոռոգման համակարգում իրականացված աշխատանքներին: Փոխվարչապետին ուղեկցել են Արմավիրի մարզպետ Աշոտ Ղահրամանյանը, «ՀՄՀ-Հայաստան» ՊՈԱԿ-ի տնօրեն Արա Հովսեփյանը, պատասխանատու այլ անձինք:
Փոխվարչապետը նախ եղել է Ապագա համայնքում, որտեղ ավարտին են մոտենում նախկինում չգործող խորքային հորի վերականգնման աշխատանքները: Այն արդեն պատրաստ է շահագործման:
Արտաշարում Ա.Գևորգյանը ծանոթացել է պոմպակայանի վերականգնման աշխատանքների ընթացքին: Պոմպակայանը նախատեսվում է շահագործման հանձնել սեպտեմբերի վերջին, ներկայումս ընթացքի մեջ են մոնտաժման և փորձարկման աշխատանքները: Փոխվարչապետը հանձնարարել է մինչ շահառուին հանձնելը արագացնել փորձարկումը, շտկել հնարավոր թերությունները:
Երասխահուն համայնքում Ա.Գևորգյանին ներկայացվել է նոր ջրագծի կառուցման աշխատանքների ընթացքը: Շուրջ 1 մլն դոլարի ներդրմամբ կառուցվել է 3 կմ-անոց նոր ցանց, որը փոխարինելու է դրենաժային հին համակարգին: Կատարվել է աշխատանքների 90 տոկոսը, մնացած մասն ավարտին կհասցվի առաջիկա շաբաթվա ընթացքում:
Փոխվարչապետը ներկա է գտնվել նաև համայնքի միջնակարգ դպրոցի անվանափոխությանը նվիրված արարողությանը: Դպրոցն այսուհետ կրելու է ազատամարտիկ Մարտիկ Գևորգյանի անունը: