Լուսանկարը՝ Armeniasputnik-ի
«Ես կարծում եմ, որ բոլոր պարագաներում Սամվել Շահրամանյանը կգտնի այն լուծումը, որը օգուտ կլինի մեր ժողովրդին, իրեն չի խայտառակի բոլոր ժամանակներում և կբացառի այն հանգամանքը, որ մեկ մարդ, նույնիսկ եթե նա հանրապետության նախագահ է, կարող է լուծարել այդ հանրապետությունը», լրագրողների հետ զրույցում դեկտեմբերի 28-ին հայտարարել է երրորդ նախագահ Սերժ Սարգսյանը, անդրադառնալով Արցախի հանրապետության «լուծարման» հարցին, կապված Շահրամանյանի հայտնի «հրամանագրի հետ: Խայտառակելու վերաբերյալ Սերժ Սարգսյանի ակնարկը բավականին բազմիմաստ է, եւ առնվազն առաջացնում է հարց՝ Սարգսյանը ավելի շատ մտածում է այն մասին, որ Շահրամանյանն ինքն իրե՞ն չի խայտառակի, թե՞ մարդկանց, որոնք շնորհավորում էին նրան Արցախի նախագահի պաշտոնը ստանձնելու կապակցությամբ եւ ակնկալում ծայրահեղ բարդ խնդիրների լուծում:
Սերժ Սարգսյանն ինքն էլ այդ շնորհավորողների շարքում էր, թեեւ իհարկե հասկանալի է, որ այդ շնորհավորանքները տոնական չէին: Բայց, բոլոր դեպքերում, դրանք կային, հետեւաբար Շահրամանյանի «հրամանագիրը» ըստ էության խայտառակում է նաեւ այդ շնորհավորանքների հեղինակներին: Անշուշտ ոչ բոլորին, այլ նրանց, ովքեր ունեն քաղաքական տրամաչափ եւ առավել եւս կարգավիճակային տրամաչափ, ինչպես օրինակ Հայաստանի նախկին նախագահի կարգավիճակը:
Սերժ Սարգսյանն օրինակ իրազե՞կ էր, թե ինչ վիճակ է Արցախի շուրջ եւ պատկերացնու՞մ էր՝ ինչ կարող է անել Շահրամանյանն այդ պարագայում, կամ ավելի շուտ՝ պատկերացնու՞մ էր, որ Շահրամանյանը ոչինչ էլ չի կարող անել եւ պարզապես գնում է «կառափնարան»՝ Արցախի հայության հետ միասին: Շահրամանյանը դարձավ «ընդունելի» բոլոր համար, որովհետեւ նրա «ստորագրության» վրա էր մնալու հայ ժողովրդի եւ հայկական պետականության ողբերգական ու նաեւ ամոթալի էջերից մեկի պատասխանատվությունը:
Այդ իմաստով, եթե դիտարկենք իրավիճակը, ապա՝ անկախ, թե ինչ կանի Շահրամանյանը, խայտառակությունը բացարձակապես նրանը չէ, այլ Հայաստանի բոլոր ժամանակների եւ ներկայումս կառավարող քաղաքական, տնտեսական ու ռազմական «էլիտաներինը», որոնք իրենց հաջորդական տարբեր տրամաչափի ու խորության սխալներով, հասցրին իրավիճակը ողբերգական կետին: Սա իհարկե չի նշանակում, որ չպետք է լուծվի Շահրամանյանի «ստորագրության» հարցն ու պահպանվի Արցախի իրավունքը: Այլ խնդիր է՝ այդ հարցու՞մ էլ Շահրամանյանը մենակ է, թե՞ ոչ: Ի դեպ, դեկտեմբերի 28-ին տեղեկություն է տարածվել, որ Երեւանի պարեկները կանգնեցրել են Շահրամանյանի մեքենան եւ զգուշացրել, որ երթեւեկի առանց շարասյան:
