Չնայած որ երկնագույն վառելիքը վաղուց արդեն հասանելի է մեր երկրում, Հայաստանի անտառներում շարունակվում են ապօրինի հատումները: Դե իսկ մեր երկրում գազի վերջին թանկացումը բնապահպան փորձագետ Սամվել Ծառուկյանի համոզմամբ` իսկական պատուհաս կդառնա անտառի գլխին: «Գազի գնի թանկացումով ձմռան նախաշեմին միանշանակ կավելանան ապօրինի ծառահատման դեպքերը, ես հիմա գալիս եմ Մարտունուց և Սյունիքից և աչքովս տեսա, որ մարդիկ 700-ից 1000 դոլար ծախսել են ու բաքսի տեղադրել, սակայն այս ձմեռվա համար արդեն փայտի փնտրտուքներ են սկսել, որովհետև հնարավորություն չունեն այդ գազն օգտագործելու»,- մեր հետ զրույցում նշեց Հայաստանի կանաչների միության նախագահ Հակոբ Սանասարյանը:
Սանասարյանը համոզված է, որ անիմաստ է մտածելը, թե գազի առկայությունը նվազեցնում է ծառահատումները, քանի որ բնակիչները հասկանում են, որ բավական թանկ գին են վճարում այն գազի համար, որի որակից էլ առանձնապես գոհ չեն:
«Եթե անցյալ տարի, մինչ այս թանկացումները, ես մուծում էի 40-50 հազար դրամ ամսեկան, չեմ էլ ուզում պատկերացնել թե այս տարի ինչ թվեր կկազմեն, գազն էլ ամբողջն օդ է, փայտ ենք վառելու»,- «Առաջին լրատվական»-ի թղթակցի հետ զրույցում նշեց Գեղարքունիքի մարզի Ճամբարակ գյուղի բնակիչ Վազգեն Գաբրիելյանը:
Խնդրով զբաղվող համապատասխան պետական մարմինները վերահաս խնդրից խուսափելու ելքեր են փնտրում: Նշենք, որ առաջիկայում կառավարությունում շրջանառության մեջ կդրվի «Անտառամերձ տարածքների բնակչությանը վառելափայտով ապահովելու» որոշման նախագիծը, որով նախատեսվում է նվազեցնել փափուկ վառելափայտի արժեքը անտառամերձ բնակչության համար: Արդյո՞ք գազի թանկացումը հետ կբերի 90-ականների անխնա ծառահատման ժամանակները, ցույց կտա ժամանակը…
