«Նովոստի» միջազգային մամուլի կենտրոնում այսօր կազմակերպվել էր «Ռուս-հայկական հարաբերությունների ներկան և ապագան. Հայաստանի անկախության 20-ամյակին ընդառաջ» թեմայով Երևան-Մոսկվա տեսակամուրջ:
ՀՀ ԱԺ և ՌԴ Դաշնային ժողովի միջև համագործակցության միջխորհրդարանական հանձնաժողովի համանախագահ Արամ Սաֆարյանն իր ելույթում հիշեց քսան տարի առաջ Հայաստանի հասարակության կողմից ընդունված հանրաքվեն, նկատեց, որ եղել են ձեռքբերումներ, իսկ դեռևս գոյություն ունեցող բացերը կիրագործվեն առաջիկա տարիներին, քանի որ քսան տարին երիտասարդ անկախության շրջան է: Ա.Սաֆարյանը նշեց, որ գոհ է հայ-ռուսական հարաբերությունների մակարդակից և հույս հայտնեց, որ համագործակցությունը նույն կերպ կշարունակվի:
Աշխատանքի եւ սոցիալական հարաբերությունների ակադեմիայի ռեկտոր Եվգենի Կոժոկինը նշեց, որ հայերն այն ժողովուրդն են, որոնք իրենց պետականության համար պայքարել են, և այդ անկախությունը հենց այնպես` արհեստականորեն չեն ձեռք բերել, և հայ ժողովրդի ջանքերի մասին միայն հոբելյանական տոներին չպետք է հիշել և ամրագրել:
ՀՀ ԱԺ և ՌԴ Դաշնային ժողովի միջև համագործակցության միջխորհրդարանական հանձնաժողովի անդամ Հերմինե Նաղդալյանը նշեց, որ անկախ Հայաստանին հաջողվել է այս քսան տարիների ընթացքում հարաբերություններ հաստատել տարբեր երկրների հետ: Նա մատնանշեց ՌԴ նախագահի` անցյալ տարի կատարած պետական այցը Հայաստան, ինչպես նաև ՀԱՊԿ-ի հետ և ԱՊՀ-ի շրջանակներում բարձր մակարդակի համագործակցությունը նա համարեց ձեռքբերում:
ՌԴ Պետդումայի` ԱՊՀ և հայրենակիցների հետ կապերի հարցերով հանձնաժողովի անդամ Կոնստանտին Զատուլինը ևս մատնանշեց այն կազմակերպությունները, որոնց և՛ Ռուսաստանը և՛ Հայաստանը անդամակցում են Խորհրդային Միության փլուզումից հետո` ռազմական, քաղաքական, տնտեսական բնագավառներում:
Անդրադառնալով ԼՂ հակամարտությանը` Զատուլինը մատնանշեց կարգավորման ուղղությամբ ՌԴ նախագահի ջանքերը, հայկական կողմի հետ ՌԴ ղեկավարության հանդիպումները. «Բանակցություններն ավելի լավ է, քան առճակտումը»:
Կովկասի ինստիտուտի տնօրեն, քաղաքագետ Ալեքսանդր Իսկանդարյանը նշեց, որ այս վերջին քսան տարիների ընթացքում մենք ստեղծել ենք մեր պետությունը, ճիշտ է` ունենք մեր պահանջները, որոնց դեռ պետք է ձգտենք հասնել ապագայում: Ի՞նչն է պատճառը հայ-ռուսական հարաբերությունների կայուն դինամիկայի` հարց ուղղեց քաղաքագետը` պատասխանելով որ թե՛ Հայաստանը ՌԴ-ի համար, թե՛ ՌԴ-ն Հայաստանի` այլընտրանք չունեցող երկրներ են, չէ՞ որ կան երկրներ, որոնք ևս ՌԴ-ի հետ սերտ հարաբերություններ ունեն, համատեղ մշակութային, աշխարհաքաղաքական շահեր, բայց հարաբերությունները, մեղմ ասած, այնքան էլ լավ չեն:
ՌԴ ԱԳՆ Միջազգային հետազոտությունների ինստիտուտի հետխորհրդային հետազոտությունների կենտրոնի տնօրեն, 2-րդ դասի արտակարգ և լիազոր դեսպանորդ Ստանիսլավ Չեռնյավսկին ճիշտ չհամարեց այն հայտարարությունները, թե խնդիրների լուծման բանալին գտնվում է Մոսկվայում: Նա նկատեց, որ խնդիրների լուծման բանալին Երևանում է, իսկ Մոսկվան, որպես գործընկեր-պետություն, կարող է աջակցել Հայաստանին:
