Business-Грузия-ի փոխանցմամբ՝ Վրաստանի նախագահ Միխեիլ Սաակաշվիլին այսօր մասնակցել է Փոթիի օդանավակայանի կառուցման մեկնարկին։ Այս կապակցությամբ Սաակաշվիլին նշել է. «Դա շատ կարևոր նախագիծ է, որն իդեալականորեն համընկնում է տարածաշրջանի զարգացման ռազմավարությանը։ Այդ նպատակով արդեն իսկ մեկնարկել է Փոթիի նավահանգստի արդիականացումը, քաղաքը գազաֆիկացվել է, բարելավվել է ջրամատակարարումը, պայմաններ են ստեղծվել բիզնեսի ու առևտրի զարգացման համար։
Փոթիի նավահանգիստը սպասարկելու է Վրաստանի ողջ սևծովյան հատվածը, ինչպես նաև Սվանեթիի լեռնային շրջանը։ Փոթիի օդանավակայանն իր հերթին զբոսաշրջիկներ կընդունի համայն աշխարհից, այն միավորում է ողջ տարածաշրջանը։ Դա կլինի այնպիսի օդանավակայան, որը կաշխատի ցանկացած եղանակի դեպքում և դրանում կկարողանա վայրէջք կատարել ցանկացած տիպի ինքնաթիռ։ Դա կլինի մշտապես գործող օդանավակայան, որը մեզ եկամուտներ կբերի և կնպաստի զբաղվածության խնդրի լուծմանը»։
Սաակաշվիլին նաև շնորհակալություն է հայտնել արաբական «Ռակիկա» ընկերությանը՝ օդանավակայանի կառուցման մեջ ներդրում անելու համար։
Հիշեցնենք, որ ապրիլի վերջին Սաակաշվիլին մասնակցել էր տեղի օդանավակայանի համար ռադարի տեղակայմանը, որի գործողության շառավիղը կազմում է 400 կիլոմետր, այսինքն` նրա տեսանելիության տիրույթում են գտնվում Վրաստանի տարածքի մի մասը (արևմտյան-սևծովյան հատվածը), ինչպես նաև Հայաստանի, Ադրբեջանի, Ռուսաստանի, Թուրքիայի տարածքի մի մասը:
Այդ ժամանակ Սաակաշվիլին հայտարարել էր. «Վրաստանի համար ռազմավարական նշանակություն ունեցող Փոթիի օդանավակայանն իր գործունեությունը կսկսի արդեն 2012 թվականին և հանդիսանալու է Սևծովյան ավազանի երկրների ամենամեծ և ռազմավարական օդանավակայանը: Փոթիի օդանավակայանը կիրականացնի միջազգային ավիաչվերթներ և չի զիջի Թբիլիսիի օդանավակայանին: Փոթին Վրաստանի տնտեսության երաշխիքն է»:
Մայիսի սկզբներին էլ Սաակաշվիլին հայտարարել էր. «Մենք Վրաստանում կկառուցենք 10 օդանավակայան, և դրանցից յուրաքանչյուրի բացումը կկատարեմ անձամբ ես: Հաջորդ տարի էլ մենք ժամանակակից ինքնաթիռներ կգնենք Ֆրանսիայից»։
