Միլլի մեջլիսի նախկին պատգամավոր Գյուլթեքին Հաջիբեյլին (Հաջիեւան), ում ԵԽԽՎ-ում Հայաստանի խորհրդարանական նախկին պատվիրակությունների անդամները պետք է հիշեն Ստրասբուրգում բոցաշունչ ելույթներից, սոցիալական ցանցի իր էջում այսպիսի գրառում է կատարել. «Ընկերներս պահանջում են, որ Ադրբեջանը բացի հարեւան երկրների հետ ցամաքային սահմանները: (Թագավարակի դեմ պայքարի պատճառաբանությամբ Ադրբեջանը Ռուսաստանի, Վրաստանի եւ Իրանի հետ սահմանները փակել է 2020թ. մարտին): Միամիտ մարդի՜կ… Մենք, կարծես, Ղարաբաղի հարցը լուծել ենք, բայց չէ՞ որ ունենք Թավրիզի, Երեւանի, Բորչալուի, Դերբենտի խնդիրներ: Ադրբեջանը բաց սաման կարող է ունենալ Թուրքմենստանի եւ Ղազախստանի հետ, դրանք էլ, ցավոք, ցամաքային չեն»:
Սա էպիկրիզ է: Հաջիբեյլին քաղաքականության մեջ է 2000-ական թվականներից, երկու անգամ Միլլի մեջլիսի պատգամավոր է ընտրվել որպես իշխող կուսակցության թեկնածու: Մեկ տասնամյակ նա հանդիսացել է խորհրդարանի արտաքին հարաբերությունների հանձնաժողովի եւ ԵԽԽՎ-ում ադրբեջանական պատվիրակության անդամ եւ, բնականաբար, քաջատեղյակ է պաշտոնական Բաքվի արտաքին քաղաքականության ընդհանուր կոնցեպցիային, բացահայտում է այն, ինչից պարզ հետեւում է, որ Իլհամ Ալիեւը տարածքային պահանջներ ունի հարեւան բոլոր երկրների՝ Իրանի, Հայաստանի, Վրաստանի եւ Ռուսաստանի նկատմամբ:
Ղազախստանը եւ Թուրքմենստանը կարող են առժամանակ իրենց հանգիստ զգալ, Ադրբեջանը նրանցից բաժանված է Կասպից ծովի միջազգային ճանաչված ջրային տարածքով: Բայց դա երաշխիք չէ: Վերջին տասնամյակում Ադրբեջանը զգալիորեն արդիականացրել է ռազմածովային ուժերը: Ի դեպ, այդ ծրագրերին զգալի օժանդակություն են ցուցաբերել Միացյալ Նահանգները՝ ադրբեջանական նավատորմը դիտարկելով որպես իրանականին հակակշիռ:
Ուշագրավ է, որ Հաջիբեյլին այդ գրառումն արել է նույն օրը, երբ Իլհամ Ալիեւը ընդունել է ԵԱՀԿ Խորհրդարանական վեհաժողովի նախագահին եւ հավաստիացրել, որ Ադրբեջանը ոչ միայն հավատարիմ է տարածաշրջանի խաղաղության եւ կայունության օրակարգին, այլեւ ինքն է հանդես գալիս նման նախաձեռնությամբ, իսկ Միլլի մեջլիսի խոսնակ Գաֆարովան ԵԱՀԿ խորհրդարանականներին հորդորել է «ձեռնպահ մնալ երկակի ստանդարտներից եւ չսկսել այնպիսի քննարկումներ, որ կնպաստեն Հայաստանի ոչ կառուցողական հռետորաբանության ծավալմանը»:
