«Մոտ ապագայում ՀԱԿ-իշխանական կոալիցիա երկխոսությունը կվերսկսվի»,- այսօր լրագրողների հետ հանդիպման ժամանակ ասաց ԱԺ ՀՀԿ խմբակցության պատգամավոր Գագիկ Մելիքյանը` խոսելով առկախված երկխոսության մասին:
«Երկխոսությունը մեկնարկեց ՀՀ նախագահ Սերժ Սարգսյանի հավասարակշռված քաղաքականության շնորհիվ:
Երեք տարի առաջ նախագահը հրավիրում էր երկխոսության, իսկ ՀԱԿ-ը միայն երեք տարի հետո հասկացավ»,-նման կարծիք հայտնեց պատգամավորը` հավելելով, որ ՀԱԿ-ն է առկախել երկխոսությունը, թող ինքն էլ վերսկսի: Նա նաև նշեց, որ ՀԱԿ ակտիվիստ Տիգրան Առաքելյանի ձերբակալության դեպքն ընդամենը առիթ էր, և պետք չէ երկխոսությունը կապել այդ ձերբակալության հետ:
Գ. Մելիքյանը հորդորեց ՀԱԿ-ի իր գործընկերներին վերսկսել երկխոսությունը` խնդրելով ըմբռնումով վերաբերվել իր հորդորին: «ՀԱԿ-ը պատճառ չի ունեցել երկխոսության առկախման համար, և պետք չէ իշխանության հետ ուլտիմատումով խոսել, որովհետև քաղաքական փոքրամասնությունները որոշումներ կայացնելու իրավունք չունեն»,- ասաց ԱԺ պատգամավորը` համոզված պնդելով, որ ՀԱԿ-ը քաղաքական մեծամասնություն չէ:
