«Առավոտ»-ը գրում է, որ Երևանի պետական համալսարանում շրջանառվող լուրերի համաձայն` վերջին շաբաթների ընթացքում մեծ քանակությամբ ուսանողներ և երիտասարդ դասախոսներ են անդամագրվել Հայաստանի հանրապետական կուսակցությանը:
«Հիշեցնենք, որ բուհի տարածքում քաղաքական գործունեություն ծավալելը և կուսակցական քարոզչությամբ զբաղվելը համարվում է օրենքի կոպիտ խախտում»,- գրում է թերթը և հավելում.
«Մեր աղբյուրի փախնցմամբ` կուսակցականացման գործընթացը ԵՊՀ-ում ղեկավարում է բուհի ուսանողական բաժնի պետ Միհրան Հակոբյանը: Կասկածից վեր է, որ այս ամենի մասին տեղյակ է նաև ռեկտոր Արամ Սիմոնյանը, որի հովանավորյալն է հենց Մ. Հակոբյանը: Մեր ունեցած տեղեկությունների համաձայն`Մ. Հակոբյանը ուսանողական խորհրդի և կուսակցական դասախոսների միջոցով ստեղծել է քաղաքական ուղղվածություն ունեցող կազմակերպչական ցանց, որը մի կողմից`օգտագործվում է ռեկտոր Արամ Սիմոնյանի հենարանը ամուր պահելու գործում, մյուս կողմից` ՀՀԿ շարքերը համալրելու արդյունավետ մեխանիզմ է: Այսպիով, Արամ Սիմոնյանի երիտասարդների խումբը ներկայումս ժրաջան աշխատանք է ծավալում ԵՊՀ-ում, և մոտ ապագայում մենք ականատես ենք լինելու «դեմքով դեպի կուսակցություն» ծրագրի հաջորդ փուլերին»:
