Սեպտեմբերի 21-ին Եվլախում կայացած հանդիպման առնչությամբ տարածած հայտարարության մեջ Արցախի տեղեկատվական շտաբը հայտնում է, որ հանդիպումն անցել է գործնական մթնոլորտում և քննարկվել են երկուստեք կարևոր հարցեր: Ինչպես հայտնի է, Եվլախում հանդիպման վերաբերյալ պայմանավորվածությունը ձեռք է բերվել ադրբեջանական հարձակումից հետո, այն կանգնեցնելու համար:
Ըստ պայմանավորվածության, պետք է լուծարվի Արցախի ՊԲ-ն, նաև Ադրբեջանը առաջ է քաշում Արցախի պետական կառույցները լուծարելու խնդիրը: Ադրբեջանական կողմն էլ իր տարածած հայտարարության մեջ նշել է, թե պետք չէ ակնկալել, որ մեկ հանդիպումով կլուծվեն բոլոր խնդիրները, քանի որ դրանք պահանջում են տեւական գործընթաց: Հաջորդ հանդիպման մասին տեղեկություններ չկան, փոխարենն իրարամերժ են Արցախից ստացվող տեղեկությունները: Արցախում ակնհայտորեն նոր իրավիճակ է, որոշակի պայմանավորվածծությունների նոր ռեժիմ, սակայն պարզ չէ այդ պայմանավորվածությունների կողերի իրական շրջանակը: Տեսանելին անշուշտ Ռուսաստանն է, Ստեփանակերտն ու Բաքուն, սակայն հնարավոր է, որ այդ պայմանավորվածությունները առնվազն քննարկվել են թե Հայաստանի, թե Թուրքիայի, թե Իրանի հետ, թեեւ պաշտոնական ներգրավվածություն չունի նրանցից որևէ մեկը:
Ըստ էության, հնարավոր է արձանագրել, որ արդեն տեւական ժամանակ միջնորդական տարբեր ձեւաչափերում շոշափվող եւ քննարկվող «ռեինտեգրացիայի» օրակարգը ներդրվել է ադրբեջանական ագրեսիայի եւ Ռուսաստանի «խաղաղարար» միջամտության միջոցով: Բայց, թերեւս դժգոհ չի լինի նաեւ Արեւմուտքը, ելնելով մի քանի հանգամանքից:
Նախ, չեն խանգարել Ադրբեջանին, հետեւաբար առնվազին պասիվ ռեժիմում ցուցաբերել են աջակցություն եւ ըստ այդմ Բաքուն «պարտք» է չխանգարելու համար, երկրորդ՝ որքան էլ Մոսկվան «գետնի վրա» առաջ է անցել «ռեինտեգրացիայի» օրակարգի շուրջ գործնական քննարկումներ խթանելու հարցում, միեւնույն է, այդ «առաջանցումը» տեղի է ունեցել հայ ժողովրդի, հայության, արցախահայության աչքում վարկաբեկման՝ մեծ ծավալի վարկաբեկման գնով, ինչն Արեւմուտքը եւս կգումարի իր ակտիվին: Մրցակցությունը շարունակվելու է, եւ սա չի հարուցում կասկած, ու մեծ հավանականությամբ կմեծանա Հայաստանի հանրապետության ուղղությամբ դրա սուր եւ ակտիվ բնույթի չափաբաժինը, հարցն այնէ, թե ինչպես եւ ինչ գործիքներով:
