Ուկրաինայի նախագահ Վոլոդիմիր Զելենսկին հույս ունի համոզել Ջո Բայդենին հեռահար ATACMS համակարգեր փոխանցել ուկրաինացի զինվորականներին։ Այս մասին Զելենսկին խոսել է «Սի Էն Էն»-ին տված հարցազրույցում։
«Հույս ունեմ, որ կխոսեմ նախագահ Բայդենի հետ։ Նրա կարծիքն ու աջակցությունն ինձ համար շատ կարևոր են։ Կարծում եմ՝ նա կարող է փոխել պատերազմի այս էջը։ Նա արդեն մեկ անգամ դա արել է HIMARS-ի հետ»,- ասել է Զելենսկին։
Նախագահը նշել է, որ սա Ջո Բայդենի հետ այս հարցի շուրջ իր առաջին քննարկումը չէ։
«Մենք առաջ ենք գնում։ Հուսանք՝ աշնանը կընդունենք դրանք։ Մեզ համար շատ կարևոր է կանգ չառնել այս հակագրոհում»,- հավելել է Ուկրաինայի նախագահը։
Ավելի վաղ Financial Times-ը հայտնել էր, որ նախագահ Բայդենը շուտով որոշում կկայացնի Ուկրաինային ATACMS հրթիռների փոխանցման վերաբերյալ։
Ինչպես հայտնի է, Կիեւը երկար ժամանակ ԱՄՆ-ից ATACMS հրթիռներ էր խնդրում։
