Կարեն Կարապետյանի պաշտոնանկությունը բավական հետաքրքիր հարցեր է առաջացնում Սերժ Սարգսյանի և ռուսաստանցի խոշոր գործարար Սամվել Կարապետյանի փոխհարաբերությունների վերաբերյալ: Ինչպես հայտնի է՝ Սամվել Կարապետյանը, որը միլիարդատեր է, Կարեն Կարապետյանի եղբայրն է, և հենց Սամվել Կարապետյանի ֆինանսական ազդեցությամբ է Կարեն Կարապետյանը Հայաստանի իշխող համակարգում դարձել ազդեցիկ դեմքերից մեկը: Եթե նա այժմ պաշտոնանկ է լինում ու նաև հեռանում քաղաքական պրոցեսներից, այստեղ, բնականաբար, հետաքրքիր է դառնում, թե այդ հանգամանքը ինչպե՞ս է ազդելու Սամվել Կարապետյանի և Սերժ Սարգսյանի փոխհարաբերության վրա:
Բանն այն է, որ, Սերժ Սարգսյանի նախագահ դառնալուց ի վեր, Սամվել Կարապետյանը բավական առաջնային պլան է դուրս եկել Հայաստանի իշխանության հետ հարաբերության առումով: Եթե, օրինակ, Ռոբերտ Քոչարյանի իշխանության ժամանակ ռուսաստանահայ բիզնեսմեններից առաջային և ակտիվ պլանում Արա Աբրահամյանն էր, ապա Սերժ Սարգսյանի նախագահությունից հետո, փաստորեն, տեղի ունեցավ ռոտացիա, և Սամվել Կարապետյանը մղվեց առաջնային պլան. նա կարծես թե թիվ մեկ բարեգործն է այսօր, թիվ մեկ ներդրողը Հայաստանի տնտեսությունում:
Արդյո՞ք Կարեն Կարապետյանին հեռացնելը նշանակում է, որ առաջիկայում Հայաստանին տնտեսական ասպարեզում կրկին առաջնային դեմքի ռոտացիա է լինելու, թե՞ պարզապես, երկար ժամանակ ունենալով քաղաքական հավակնություններ, Սամվել Կարապետյանն ի վերջո Սերժ Սարգսյանի հետ եկել է երաշխիքային փոխհամաձայնության և հրաժարվում է քաղաքական հավակնություններից՝ դրա դիմաց ստանալով բիզնես երաշխիքներ, որ առանց քաղաքական սեգմենտում ներկայացվածություն ունենալու էլ ինքը կարող է հանգիստ լինել Հայաստանում իր ներդրումների համար: Սակայն տվյալ պարագայում էլ հարց է առաջանում, թե Կարապետյանն էլ ինչու պետք է իրեն այսպես ասած ֆինանսապես «ճղի» Հայաստանում ներդրումներ անելու համար, առավել ևս՝ եթե տեղի կապիտալն է արդեն սկսել արտահոսել Հայաստանից: Որն է լինելու Սամվել Կարապետյանի, այսպես ասած, քյարը, եթե նա Հայաստանում շարունակելու է փող ծախսել՝ հանձնելով իր քաղաքական հավակնությունները: Հետևաբար, արդյոք չի՞ բացառվում, որ մենք առաջիկայում ականտես լինենք նաև Սամվել Կարապետյանի բիզնես-դերի փոփոխության: Այսինքն՝ Կարեն Կարապետյանի պաշտոնանկությունը, ըստ ամենայնի, կարող է իշխանության մեջ ենթադրել տնտեսական վերաբաշխում: Այսինքն՝ Կարապետյանի պաշտոնանկությունը մի այսբերգ է, որն ունի քաղաքական և տնտեսական մասեր, և հարց է, թե դրա որ մասն է այսբերգի տակը, որը սովորաբար ավելին է լինում, քան այն, ինչ երևում է ջրի վրա: