«Սունդուկյանի» շենքը կա, ուրիշ ոչինչ չկա

Այսօր լրագրողների հետ հանդիպմանը, անդրադառնալով Սունդուկյանի թատրոնի ներկայիս վիճակին, առկա խնդիրներին, Վարդան Աճեմյանի անվան Գյումրու թատրոնի գեղարվեստական ղեկավար Նիկոլայ Ծատուրյանն ասաց, որ շենքը կա, այն մնացել է, բայց ուրիշ ոչինչ չկա։ Այսպես գնահատեց նա թատրոնի վիճակը՝ ավելացնելով, որ «Շարմը» աչք է դրել Սունդուկկյանի վրա։ «Ուզում է` թող մեկ այլ տեղում բեմահարթակ կառուցի, այլ տեղում»,- ասաց Ն. Ծատուրյանը։ Նրա խոսքով` լսել է, որ Դավիթ Մուրադյանին առաջարկել են դառնալ Սունդուկյանի գեղղեկավար, սակայն դեռ հայտնի չէ թատրոնի ճակատագիրը։ Նա լուծման տարբերակ է առաջարկել որոշ ժամանակով փակել Սունդուկյանը, հետո վերաբացել։

Իսկ Գաբրիել Սունդուկյանի անվան ակադեմիական թատրոնի դերասան, ժողովրդական արտիստ Կարեն Ջանիբեկյան էլ կատակով առաջարկեց մի փոքրիկ թատրոն կառուցել այգում, Սունդուկյանի շենքն էլ թողնել միայն NO Comment ներկայացման համար, քանի որ հիմա մարդիկ Սունդուկյան են գնում միայն այդ ներկայացումը նայելու։

Ն. Ծատուրյանն էլ առաջարկեց տարբեր բեմադրիչների հրավիրել, որոնք տարբեր ներկայացումներ կբեմադրեն, սակայն Կ. Ջանիբեկյանը չհամաձայնեց` պնդելով, որ լավագույն դերասանները պետք է լինեն Սունդուկյանից և պետք է ունենան մեկ գեղղեկավար։ «Չնայած Վահեն ինձ տասներկու տարի թթու դրեց, ոչ մի դեր չտվեց, բայց լավ էր, որ գեղղեկ կար։ Ցավում եմ, որ թատրոնն այդ վիճակում է։ Անշնորհքները աշխատում են ամբողջ ռիթմով, շնորհալիները` կես ռիթմով»,- ասաց Կ. Ջանիբեկյանը։

Նիկոլայ Ծատուրյանն էլ ընդգծեց, որ չկա այսօր մի ձեռք, որը Սունդուկյանում թելադրի թատրոնի կանոնները։ «Ես չեմ ուզում անել «Ութ ու կես», «Յոթ ու ութ» և այլն, որ միայն խրխինջ են առաջացնում։ Դա արվեստում կոչվում է խրխինջիզմ»,- սարկազմով ասաց նա` ընդգծելով, որ փչացրել են հանդիսատեսին, հիմա էլ բողոքում են։ Անդրադառնալով սերիալային բումին, որը մեծ պահանջարկ է վայելում դերասանների մոտ, Ն. Ծատուրյանն ասաց, որ քանի դեռ սերիալը կարող է դերասանին տալ հինգ-վեց հարյուր հազար դրամ, իսկ թատրոնը` վաթսուն-յոթանասուն հազար դրամ, խոսելը թատրոնի մասին անիմաստ է։