ԱՄՆ ազգային անվտանգության հարցերով խորհրդական Ջեյք Սալիվանն արձագանքել է Washington Post-ի հոդվածին, որը, հիմնվելով ամերիկյան հետախուզության աղբյուրների վրա, հայտնում է, որ Ուկրաինան չի կարողանա հասնել հակահարձակման հիմնական նպատակին։
«Այն, ինչ մենք տարբեր տեղերում, տարբեր ճեպազրույցներում հայտարարել ենք, նույնն է մնում։ Մենք անում ենք ամեն ինչ՝ աջակցելու Ուկրաինային և նրա հակահարձակմանը։ Մենք չենք պատրաստվում միջամտել արդյունքին»,- ասել է Սալիվանը։
Բայդենի խորհրդականը նշել է, որ ԱՄՆ-ը կանխատեսումներ չի անի ուկրաինական պատերազմի վերաբերյալ, քանի որ այն «բնականաբար անկանխատեսելի է»։
«Ես հավատում եմ ուկրաինացի զինվորականների կարողություններին և հատկապես քաջությանը ռազմաճակատում հետագա առաջընթաց գրանցելու համար»,- հավելել է Սալիվանը։
Սալիվանը խոսել է հակահարձակման ժամանակ ուկրաինական զինված ուժերի առաջընթացի մասին, սակայն նշել է, որ դա բարդ ու երկար մարտ է լինելու։
