Սպառնալիքներով լի հրապարակումներ են հայտնվել Facebook սոցիալական ցանցում ԱՄՆ վարչակազմի էջի վրա, որոնք դարձել են հատուկ հետաքննության առարկա: Դրանք հայտնվել են 2001 թ. սեպտեմբերի 11-ին ԱՄՆ-ում տեղի ունեցած ահաբեկչությունների 10-րդ տարելիցի նախօրեին: Այս մասին հաղորդում է BBC-ն:
«Մենք կվերադառնանք 2011 թ. սեպտեմբերի 11-ին, որպեսզի սպանենք բոլորիդ»,- ասվում էր հրապարակումներից մեկում: Մյուսին, որը բովանդակությամբ գրեթե նույնն էր, ամրակցված էր նաև Ուսամա բեն Լադենի նկարը: Այդ հրապարակումները շատ արագ հեռացվել էին Սպիտակ տան էջից: ԱՄՆ առաջին դեմքերի պաշտպանությամբ զբաղվող պետական գաղտնի ծառայության պաշտոնական ներկայացուցիչ Էդ Դոնովանն ասել է, որ խնդրահարույց այդ հրապարակումներն ուղարկվել են համապատասխան մարմիններին, որտեղ կպարզվեն դրանց հեղինակները:
Տեղեկացնենք նաև, որ ԱՄՆ տարբեր նահանգներում երեկ ահազանգեր են ստացվել ահաբեկչության վտանգի մասին, օդ են հանվել կործանիչներ «տարօրինակ» ինքնաթիռներին ուղեկցելու համար, սակայն բոլոր այդ ահազանգերը եղել են կեղծ:
