Նիգերում հեղաշրջում իրականացրած զինվորականները հայտարարել են երկրի օդային տարածքը փակելու մասին՝ դա պատճառաբանելով Արևմտյան Աֆրիկայի երկրների կողմից «միջամտության սպառնալիքի» առկայությամբ։ Այս մասին հաղորդում է France24 հեռուստաալիքը։
Արևմտյան Աֆրիկայի երկրների միությունն անցյալ շաբաթ վերջնագիր էր ներկայացրել՝ պահանջելով, որ գեներալները մինչև օգոստոսի 6-ի գիշերը հրաժարվեն իշխանությունից։
«Բախվելով միջամտության սպառնալիքին, որն ավելի ու ավելի ակներև է դառնում հարևան երկրների նախապատրաստության շնորհիվ, Նիգերի օդային տարածքը փակ է այսօրվանից՝ կիրակիից, բոլոր ինքնաթիռների համար՝ մինչև այդ մասին լրացուցիչ ծանուցում չլինի», – Նիգերի պետական հեռուստատեսությունը մեջբերում է զինվորականների հայտարարությունը:
Հեռուստաալիքի տվյալներով՝ խռովարարները նախազգուշացրել են, որ օդային տարածքը խախտելու ցանկացած փորձ կհանդիպի «վճռական ու անհապաղ պատասխանի»։
Միաժամանակ Ֆրանսիայի ԱԳՆ-ն հաղորդել է, որ Փարիզը դադարեցնում է օգնությունը Բուրկինա Ֆասոյին, որն իր աջակցությունն է հայտնել Նիգերի ապստամբներին։
«Ֆրանսիան մինչև հետագա ծանուցումը կասեցնում է Բուրկինա Ֆասոյում զարգացման նպատակներով օգնություն և բյուջետային աջակցություն ցուցաբերելու իր բոլոր գործողությունները»,- ասվում է արտաքին քաղաքական գերատեսչության հայտարարության մեջ:
Հեղաշրջում իրականացրած զինվորականներին աջակցություն է հայտնել նաև Մալին։ Բուրկինա Ֆասոն և Մալին համատեղ պաշտոնական պատվիրակություն են ուղարկել Նիգեր՝ իրենց աջակցությունը հայտնելով երկրի ռազմական ղեկավարությանը։
