Հյուսիսային Կորեայի առաջնորդ Կիմ Չեն Ընը հուլիսի 28-ին հանդիպում է ունեցել Չինաստանի պատվիրակության հետ՝ 1950-1953 թվականների Կորեական պատերազմում հաղթանակի 70-ամյակի կապակցությամբ, Gazeta.ru–ի փոխանցմամբ՝ հայտնում է Կորեայի կենտրոնական լրատվական գործակալությունը:
Գործակալության տվյալներով՝ Կիմ Չեն Ընը երախտագիտություն է հայտնել Չինաստանի կառավարությանը և չին ժողովրդին՝ պատերազմում օգնություն ցուցաբերելու և կուսակցության, իր ժողովրդի արդար գործին մշտապես աջակցելու համար։
Կորեական պատերազմը տևել է երեք տարի՝ 1950 թվականի հունիսի 25-ից մինչև 1953 թվականի հուլիսի 27-ը։ Հյուսիսային Կորեայում այն սովորաբար անվանում են «Հայրենական ազատագրական պատերազմ»։ Կողմերի միջև կոնֆլիկտի ժամանակ ԽՍՀՄ-ը աջակցություն էր ցուցաբերում Հյուսիսային, իսկ ԱՄՆ-ն՝ Հարավային Կորեային։ Պատերազմի արդյունքում ստորագրվել է հրադադարի մասին համաձայնագիր, որով ամրագրվել է թերակղզու բաժանումը երկու մասի։ Երկու Կորեաների միջև խաղաղության պայմանագիրը դեռ ստորագրված չէ, նրանք ֆորմալ առումով պատերազմի մեջ են։
