Հուլիսի վեցին Լվովը ենթարկվել է հուժկու հրթիռակոծման, որի հետևանքով զոհվել է առնվազն 5 բնակիչ: Եվս 37 մարդ տարբեր աստիճանի վնասվածքներ է ստացել: Լվովի քաղաքապետ։ Անդրեյ Սադովոյի փոխանցմամբ, դա «ամենախոշոր գրոհն էր քաղաքի ենթակառուցվածքների վրա 2022 թվականի փետրվարին սկսված պատերազմի ընթացքում»: Նրա խոսքով՝ հրթիռներից մեկի բեկորներն ընկել են բնակելի տան վրա և ոչնչացրել են մոտ վեց տասնյակ բնակարաններ, սկսվել է հրդեհ, որը հաջողվել է մարել: Փրկարարները շարունակում են աշխատել ողբերգության վայրում։ Լվովի հայ համայնքի ներկայացուցիչ Պետրոս Հակոբյանը «Առաջին լրատվական»-ի հետ զրույցում նշեց, որ այս պահին զոհերի վերջնական թիվը 10 է. «Այս պահին ավարտվել են փրկարարական աշխատանքները: Առայժմ 14 մարդ գտնվում է հիվանդանոցներում, հայկական համայնքից տուժածներ չկան: Բոլորը տվյալ շենքի բնակիչներ են»:
Նա նկատեց, որ չնայած այդ հարձակմանը, Լվովում վիճակը հանգիստ է, քան մնացած բնակավայրերում, որոնք ավելի մոտ են ճակատային գծին. «Խուճապ չկա քաղաքում, ամեն ինչ գործում է սովորականի պես, և տրանսպորտը, և սննդի կետերը: Բայց ամեն դեպքում, ամբողջ երկրի բնակչությունը պատերազմական երկրին բնորոշ բնակչություն է: Շատերը տառապում են, շատերը մասնակցում են պատերազմին, հայ համայնքից ևս ունենք զոհեր»,-ասաց նա:
Հարցին, թե շա՞տ հայեր են մասնակցում պատերազմին Լվովից, ինչպիսի ակտիվություն է ցուցաբերում քաղաքի հայ համայնքը, Պետրոս Հակոբյանը պատասխանեց. «Համայնքն ինքն իրենով ոչ մի ակտիվություն չի ցուցաբերում, բոլորս Ուկրաինայի բնակիչներ ենք՝ հավասար իրավունքներով: Ով զորակոչվել է ծառայության, նրանք էլ մասնակցում են պատերազմին: Տեղի հայ համայնքից ունենք զոհեր, անհետ կորածներ»: Անդրադառնալով պատերազմից հետո Ուկրաինայից հեռացողները, նա նշեց, որ հիմնականում հեռացողները այն հայերն էին, որոնք ունեին ժամանակավոր կացության իրավունք Ուկրաինայում, իսկ Ուկրաինայի քաղաքացի հայ համայնքի ներկայացուցիչներից մի մասը տեղափոխվել է Հայաստան, մի մասը Եվրոպա, բայց հիմնական հոսքը ժամանակավոր բնակորւթյան իրավունք ունեցողներն են եղել:
