Թուրքական Posta թերթի փոխանցմամբ՝ Բիթլիսի նահանգի Ադիլջևազ շրջանում ջուրն է իջեցվել շարժական լողավազան։ Ադիլջևազի կայմակամ Ահմեդ Դիլսիզը նշել է, որ տարածաշրջանում առաջինն իրենք են կյանքի կոչել այսպիսի նախագիծ.
«Այն կառուցվել է կիսաօլիմպիական չափորոշիչներով, խորությունը կազմում է 1.4-1.6 մետր։ Նախագծով նախատեսվում է շարժական լողավազանի շուրջ բացել սրճարան, տեղադրել հովանոցներ, պառկելատեղիներ։ Լողավազանի ջուրը կարիք չի զգում մաքրման, քլորացման կամ այլ փոփոխության, քանի որ այն մշտապես թարմացվում է Վանա լճի առողջարար ջրով։
Ես հավատում եմ, որ շարժական լողավազանը կնպաստի զբոսաշրջության զարգացմանը՝ հաշվի առնելով, որ Թուրքիայի ամենամեծ լճի ամենամաքուր ու գեղեցիկ ափերը բաժին են ընկել մեր շրջանին։ Երբ եղանակը ցրտի, մենք լճից դուրս կբերենք շարժական լողավազանը, ապա հաջորդ ամառ նորից կիջեցնենք ջուրը»։
