Թուրքական Sabah թերթի փոխանցմամբ՝ Թուրքիայի զինված ուժերի Գլխավոր շտաբի պետն իր զորահրամանատարների հետ այցելել է երկրի արևելյան շրջաններ՝ ՆԱՏՕ-ի ռադիոտեղորոշիչ կայանի (ՌՏԿ) տեղակայման համար համապատասխան վայր ընտրելու համար։ Սա իր նոր պաշտոնում Օզելի առաջին այցելությունն է ահաբեկչության (քուրդ զինյալների) դեմ պայքարում ներգրավված տարածաշրջան։
Գլխավոր շտաբի պետ, բանակի գեներալ Նեջդեթ Օզելն այդ նպատակով հետազոտելու է Դիարբեքիրի նահանգում գտնվող Փիրինչլիք ռազմաբազայի տարածքը։ Վերջինս, Մալաթիայի հետ մեկտեղ, դիտարկվում է որպես ՌՏԿ-ի տեղակայման հնարավոր վայր։
Փիրինչլիքի ռազմաբազան մինչև 1988 թվականի հոկտեմբերն օգտագործվել է ԱՄՆ կողմից՝ Սիրիայի, Իրանի ու Իրաքի սահմանային շրջանները վերահսկելու համար։ Ապա ռազմաբազան փակվել է և վերածվել շինանյութի գործարանի, որը հետագայում նույնպես փակվել է։
ՌՏԿ-ի տեղակայման տեսանկյունից Փիրինչլիքը գտնվում է աշխարհագրական հարմար վայրում։
Հիշեցնենք, որ երկու օր առաջ Իրանի խորհրդարանի ազգային անվտանգության և արտաքին քաղաքականության հարցերով կոմիտեի նախագահ Իսմայիլ Կոսարին հայտարարել էր, որ Թուրքիայում տեղակայվելիք ՌՏԿ-ն ուղղակիորեն սպառնում է Իրանին.
«Եթե Թուրքիան դրա համար հատկացնում է իր տարածքը, ապա ինչո՞ւ դա պետք է տեղադրվի նրա հարավարևելյան հատվածում՝ Իրանի սահմանին։ Ինչո՞ւ այն չի տեղակայվում մեկ այլ տեղ, ասենք՝ Թուրքիայի արևմտյան կամ հյուսիսարևմտյան հատվածում։ Եթե դա Իրանի դեմ ուղղված չէ, ապա ինչո՞ւ այն չի տեղակայվում Եվրոպայում։ Մենք անպայմանորեն դիտարկելու ենք այս հարցը»։
