Ռուսաստան կատարած այցից առաջ Թուրքիայի նախագահ Աբդուլլահ Գյուլը հարցազրույց է տվել Московский Комсомолец-ին, որում անդրադարձ է կատարել Ղարաբաղյան հակամարտության և հայ-թուրքական հարաբերությունների կարգավորման խնդիրներին: Նա, մասնավորապես, նշել է, թե Թուրքիայի մոտեցումը համընկնում է Ռուսաստանի դիրքորոշման հետ։
Գյուլի այս միտքը չափազանց հետաքրքրական է, եթե հաշվի առնենք այն հանգամանքը, որ Ռուսաստանը համարվում է Հայաստանի անվտանգության երաշխավորը, և Հայաստանի իշխանություններն ամեն անգամ թմբկահարում են այդ հանգամանքը ԼՂ հարցի շուրջ բանակցությունների ընթացքում:
Այսօրվա մամուլի ասուլիսի ժամանակ ԼՂՀ նախկին արտգործնախարար Արման Մելիքյանը, պատասխանելով «Առաջին լրատվական»-ի հարցին, թե ինչպե՞ս է վերաբերվում նման հայտարարությանը, նշեց. «Գուցե Թուրքիան է՞լ է ուզում դառնալ մեր անվտանգության երաշխավորը»:
Մելիքյանը նկատեց, որ սխալ է այն ընկալումը, թե Ռուսաստանի դիրքորոշումը Ղարաբաղի հարցում Հայաստանի համար նպաստավոր է: Նրա խոսքերով՝ Ռուսաստանը նույնպես կողմ է, որպեսզի տարածքները հանձնվեն. «Եվ եթե Ադրբեջանը համաձայնի Ռուսաստանի պայմաններին, ապա վերջինս մեծ ուրախությամբ կաջակցի, որպեսզի տարածքները հանձնվեն»:
Մելիքյանի գնահատմամբ` տարածքների հանձնումը Ռուսաստանի ձեռամբ այն գինն է, որը Հայաստանը պետք է վճարի, որպեսզի Ռուսաստանը վերականգնի իր դիրքերն Ադրբեջանում. «Ես չեմ կարծում, որ Թուրքիան դրան դեմ է, և այդ տեսանկյունից,թերևս,ԱբդուլլահԳյուլը միանգամայն ստույգ տվյալներ է հաղորդել»: