Հայ ազգային կոնգրեսի այսօր տեղի ունենալիք հանրահավաքը, ըստ էության, կարելի է համարել նախընտրական հանրահավաք: Ընդ որում, էական չէ` հերթական, թե արտահերթ ընտրությունների նախընտրական հանրահավաք: Պարզապես, սեպտեմբերը Հայաստանում անխուսափելիորեն դառնալու է նախընտրական կրքերի ոչ պաշտոնական մեկնարկ, ինչը դեռևս գարնանը ընդունում էին գրեթե բոլոր քաղաքական ուժերը:
Իսկ Հայ ազգային կոնգրեսն էլ, փաստորեն, բացում է սեպտեմբերյան քաղաքական շրջանը, քանի որ Կոնգրեսի հանրահավաքը կարծես թե առաջին խոշոր քաղաքական ակցիան է ամառային հանգստից հետո: Այսինքն` Կոնգրեսի հանրահավաքը ոչ միայն նախընտրական հանրահավաք է, այլ փաստացի նախընտրական մեկնարկ տվող հանրահավաք, որովհետև դրանում հնչելիք ելույթներն ու մեսիջները անկասկած արժանանալու են թե՛ իշխանության, թե՛ քաղաքական դաշտի մյուս առանցքային ուժերի արձագանքներին:
Այդ իմաստով կարելի է նույնիսկ ասել, որ այսօր կայանալիք հանրահավաքը զգալիորեն կանխորոշելու է ոչ միայն Կոնգրեսի հետագա գործունեությունը, այլ քաղաքական գործընթացների հետագա զարգացումը և ինչ-որ չափով նաև քաղաքական դաշտի տարբեր սուբյեկտների հետագա վարքագիծը: Իհարկե, մեղմ ասած` սխալ կլինի նրանց վարքագիծը ամբողջությամբ կամ թեկուզ կիսով չափ պայմանավորել Կոնգրեսի այսօրվա հանրահավաքով, բայց որ այն զգալի ազդեցություն կթողնի թեկուզ կարճաժամկետ առումով, երևի թե աներկբա է: Նաև երևի չափազանցություն կլինի հենց այսօրվա հանրահավաքով պայմանավորել Կոնգրեսի հետագա ամբողջ վարքագիծը, կամ էլ` թեկուզ դրա հիսուն տոկոսը:
Հայաստանում քաղաքական, տնտեսական և սոցիալական իրավիճակի փոփոխությունները շատ դինամիկ են և դժվար է պատկերացնել, որ քաղաքական որևէ ուժ կհամարձակվի թեկուզ միջնաժամկետ պլանավորումների մասին հրապարակային հայտարարություններ, մեսիջներ հղել և պատասխանատվություն ստանձնել: Առավել ևս, եթե դրան գումարենք այն, որ Հայաստանի ներքաղաքական գործընթացների վրա զգալի ազդեցություն ունեն նաև արտաքին գործոնները: Կոնգրեսի այսօրվա հանրահավաքի առարկայական նշանակությունը երևի թե կապված կլինի ոչ այնքան ապագայի, որքան անցյալի հետ` տալով ամռան ընթացքում տեղի ունեցած տարբեր իրադարձություններից առաջացած հարցերի պատասխաններ և օգնելով հանրությանը գոնե Կոնգրեսի մասով կողմնորոշվել և պատկերացումներ կազմել այդ իրադարձությունների բովանդակության հարցում:
Ապագային միտված տարրերը թերևս կլինեն հենց մոտ անցյալի կապակցությամբ տրված պատասխանների մեջ, կախված կլինեն դրանց ամբողջականությունից և սպառիչ լինելուց` այն իմաստով, որ անցյալին տիրապետելը օգնում է հնարավորինս օպտիմալ պատկերացնել ապագան:
