«Հրապարակ» թերթի դեմ սկսվել է հերթական դատական գործը: Օրաթերթը միայն հարկադիր կատարողի այցելությունից է տեղեկացել այն մասին, որ ոչ միայն ներքաշված է հերթական դատական քաշքշուկի մեջ, այլև, դատարանի որոշմամբ, զրկված է խոսքի ազատությունից: Հարկադիր կատարողի ներկայացրած փաստաթղթից պարզվում է՝ դատարանը վճռել է, որ պետք է «հայցագնի` 3.000.000 ՀՀ դրամի չափով արգելանք դնել պատասխանող «Հրապարակ» օրաթերթ ՍՊ ընկերությանը պատկանող գույքի վրա, ինչպես նաև արգելել «Հրապարակ» օրաթերթ ՍՊ ընկերությանը սույն քաղաքացիական գործով առկա վեճի հետ կապված որևէ տեղեկատվության տարածումը` մինչև գործով վերջնական ակտ կայացնելը»:
Հայաստանյան իրականությունում թերթերի դեմ դատական վեճ բացելը և իբրև վնասի հատուցում՝ աստղաբաշխական գումարներ պահանջելը դատապարտման արժանի, բայց արդեն առօրյա երևույթ է: Սակայն դատական ակտով մամուլի միջոցին խոսքի ազատությունից զրկելը՝ պահանջելով հանդես չգալ այս կամ այն թեմայով` նորություն է: Վտանգավորն այն է, որ այս նորությունը շատ արագ կարող է տարածում գտնել:
Մենք դատապարտում ենք ազատ լրատվամիջոցների դեմ շարունակվող ճնշումները: Հայտարարում ենք, որ հայաստանյան թերթերի դեմ ընթացած ու ընթացող դատական գործերը, որպես կանոն, միտված են ոչ թե հայցվորների պատիվն ու արժանապատվությունը վերականգնելուն, ինչպես հայտարարվում է դատարան դիմողների կողմից, այլ աստղաբաշխական տուգանքներով լրատվության միջոցը ձեռնասուն դարձնելուն կամ իսպառ ոչնչացնելուն:
Քանի որ դատարանը Սահմանադրության խախտմամբ «Հրապարակ» օրաթերթին զրկել է խոսքի ազատությունից` պարտադրելով ձեռնպահ մնալ «սույն քաղաքացիական գործով առկա վեճի հետ կապված որևէ տեղեկատվության տարածումից», և այդ արգելքը տարածվում է միայն «Հրապարակ»-ի վրա, ապա լրատվամիջոցներին առաջարկում ու կոչ ենք անում «սույն քաղաքացիական գործով առկա վեճի հետ կապված» հանդես գալ բազմազան մեկնաբանություններով ու հրապարակումներով: Սա կարող է լինել խոսքի ու մամուլի ազատության դեմ ուղղված իշխանությունների ու իշխանավորների թելադրանքով գործող դատարանի հակասահմանադրական որոշման լավագույն պատասխաններից մեկը:
«Իրավունքի և ազատության կենտրոն» հ/կ
նախագահ Վարդան Հարությունյան
