Ադրբեջանը, վերջին մեկ շաբաթվա ընթացքում մշտապես կեղծ տեղեկատվություն տարածելով, հենք է ստեղծում, որպեսզի կարողանա իր իսկ կողմից գործած սադրիչ գործողությունները ներկայացնել իբրև հայկական կողմի նախահարձակ գործողություններ: Այդ մասին ԱԺ-Կառավարություն հարցուպատասխանի ժամանակ արձագանքելով «Քաղաքացիական պայմանագիր» խմբակցության պատգամավոր Ալխաս Ղազարյանի՝ Ադրբեջանի կողմից հրադադարի խախտումների և ապատեղեկատվության տարածման պատճառների վերաբերյալ հարցին, հայտարարեց պաշտպանության նախարար Սուրեն Պապիկյանը:
«ՊՆ-ը մշտապես հանդես է գալիս պատշաճ հաղորդագրություններով, և այն, ինչ տեղի է ունենում սահմանին, ներկայացնում է մեր հանրությանը: Այս ամենի պատճառը ադրբեջանական կողմի նպատակներն են` ի ցույց դնելու, որ հայկական կողմը որոշակի ագրեսիվ գործողությունների միտում ունի: Նման բան չկա. հայկական կողմը մեր իսկ հնչեցրած բոլոր հայտարարություններին համապատասխան բանակցությունների սեղանի շուրջ շարունակելու է առաջ մղել խաղաղության օրակարգը, իհարկե, նաև պաշտպանելու մեր երկրի սուվերեն տարածքը»,- նշեց Սուրեն Պապիկյանը:
Հիշեցնենք, որ այսօր Ադրբեջանի զինված ուժերը ժամը 11:45-ի սահմաններում կրակ են բացել Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ, ինչի հետեւանքով վիրավորվել է Հնդկաստանի 2 քաղաքացի։
