Իրանական Aran լրատվական կայքի հաղորդմամբ, Իրանում ՀՀ դեսպան Գրիգոր Առաքելյանը հանդիպել է Իրանի Արևելյան Ատրպատական նահանգի նահանգապետին և երկկողմ հարաբերությունների շուրջ զրուցել իրանցի պաշտոնյայի հետ:
Գրիգոր Առաքելյանը հանդիպման ընթացքում իրանական կողմից պահանջել է դյուրություններ մտցնել մուտքի վիզայի տրամադրման հարցում: ՀՀ դեսպանը նշել է, թե անհրաժեշտ է, որ իրանական կողմը 24 ժամվա ընթացքում մուտքի վիզա տրամադրի Իրան այցելել ցանկացողներին: Անդրադառնալով մուտքի վիզայի գներին՝ նաև հավելել է. «Մուտքի վիզայի գները նվազեցնելու պարագայում Հայաստանի քաղաքացիներն ավելի մեծ քանակությամբ կայցելեն Իրան՝ իբրև զբոսաշրջիկներ: Շուտով Հայաստանը Ասիական զարգացման բանկից ստացած վարկերով կառուցելու է Մեղրի-Վրաստան մայրուղին, որը կարող է մեծ աճ արձանագրել Իրան-Հայաստան առևտրական հարաբերություններում»։
Իրանի Արևմտյան Ատրպատականի նահանգի նահանգապետ Ալի Ռեզա Բեյգին էլ հանդիպման ընթացքում, անդրադառնալով Իրանի կողմից Թուրքիայի, Ադրբեջանի և Վրաստանի հետ վիզայի ռեժիմի վերացմանը, նշել է. «Հույս ունեմ, որ շուտով վիզայի ռեժիմը Հայաստանի հետ էլ կվերանա, և երկու երկրների քաղաքացիները հնարավորություն կունենան ազատորեն երթևեկել միմյանց երկիր»։
Իրանցի նահանգապետը հանդիպման ավարտին նաև կարևորել է Թավրիզում Հայաստանի Հանրապետության հյուպատոսական գրասենյակի ստեղծումը և հայկական կողմին հորդորեց ավելի լուրջ մտածել այդ խնդրի շուրջ:
