Coca Cola ընկերությունը հրաժարվում է Ֆրանսիայում ներդնել ևս 17 միլիոն եվրո, քանի որ դժգոհ է այդ երկրի հարկային քաղաքականությունից: Ինչպես հայտնում է The Wall Street Journal-ը, ընկերությանը մտահոգել է այն հանգամանքը, որ Ֆրանսիայի կառավարությունը մտադիր է Coca Cola-ի վաճառքի համար հավելյալ հարկեր գանձել:
Ֆրանսիայի կառավարության այս քայլը բյուջեի դեֆիցիտի կրճատմանն ուղղված քաղաքականության մաս է կազմում: Իշխանությունները պնդում են, որ այս քայլով բյուջե մուտք կգործի 120 միլիոն եվրո: Ինչպես հայտնել է Coca Cola ընկերության ներկայացուցիչը, ներդրումները Ֆրանսիայում ընդհատվել են, իսկ Պեննե-Միրաբոյում ընկերության գործարանի 40-ամյակին նվիրված միջոցառումները չեղյալ են հայտարարվել:
Հիշեցնենք, որ երեքշաբթի օրը Ֆրանսիայի կառավարությունը հայտարարել էր մի շարք միջոցառումների մասին, որոնք մոտակա երկու տարվա ընթացքում թույլ կտան խնայել 12 միլիարդ եվրո:
