«Բանակում կան զարգացածության տարբեր աստիճաններ ունեցող զինծառայողներ, կա կոպտություն, չորություն, բռիություն` թե զինվորների մեջ, թե հին ու նոր զինվորների ու սպայական կազմի մեջ»,- լրագրողների հետ հանդիպմանն ասաց հեռավոր, սահմանամերձ զորամասերում պաշտպանության նախարարության նախաձեռնությամբ «Մտավորականները դասախոսություններով զորամասերում» միջոցառում-ակցիայի մասնակից գրականագետ Դավիթ Գասպարյանը:
«Բարեկրթությունը պետք է մտնի բանակ, պետք է հարգանք լինի իրար հանդեպ, ճշտվեն վերաբերմունքները: Թե չէ ամեն ինչ վերածվում է բռունցքի ու շատ ողբերգական հետևանքների է հանգեցնում»,- նշեց նա` ընդգծելով, որ սպայական կազմին դեռ բնորոշ է զինվորին վիրավորանք հասցնելը:
Նրա խոսքով` առաջ ավելի շատ էին «վատ դեպքերը» բանակում, ու իրեն ք փորձում են իրենց այցերով բարելավել վիճակը:
Ակցիայի մասնակից, պատմաբան Սուրեն Սարգսյանն էլ հավելեց, որ բանակում էլ կան արտոնյալ կարգավիճակում գտնվող զինվորներ: «Այն հակասությունները, որ կան հասարակությունում, արտացոլվում են բանակում՝ ավելի սուր գույներով: Այդ հարաբերությունները մուգ գույներով տեղափոխվել են բանակ»,- ասաց պատմաբանը:
Ըստ նրա` մեկ այլ` առանձին խնդիր է հրամանատարությունը, որի մեծ մասը նախկինում եղել են ոչ պրոֆեսիոնալներ, եղել են անգամ այնպիսիք, որ «հեռու չեն եղել կրիմինալից», իսկ հիմա վիճակը շտկվել է, բայց դեռ սպայական կազմում կան անձինք, որ չունեն ոչ միայն սպայական կրթություն, այլև անհրաժեշտ մարդկային որակներ: Այդուհանդերձ, ըստ նրա, բանակի առաջընթացն ակնհայտ է:
