Բուդապեշտի համար շատ դժվար կլինի համաձայնեցնել Ռուսաստանի դեմ նոր պատժամիջոցները Եվրամիության հետ, քանի որ Ուկրաինան հունգարական OTP բանկը ներառել է պատերազմի հովանավորների ցուցակում,- հայտարարել է Հունգարիայի արտգործնախարար Պիտեր Սիյարտոն Ստոկհոլմում Եվրամիության նախարարների ոչ պաշտոնական հանդիպման ժամանակ։
Սիյարտոյի խոսքով, հունգարական բանկի գործունեությունը համապատասխանում է միջազգային չափանիշներին և օրենսդրությանը:
«Արտգործնախարարների հանդիպմանը ես հստակ հայտարարեցի, որ մեզ համար շատ դժվար կլինի նույնիսկ բանակցություններ սկսել Ռուսաստանի դեմ պատժամիջոցների տասնմեկերորդ փաթեթի շուրջ, քանի որ այս ցանկում է «OTP Bank»-ը։ Մենք պահանջում ենք, որ ուկրաինացիները ցուցակից հանեն «OTP Bank-ը»,- ասել է Սիյարտոն։
Անցյալ շաբաթ Ուկրաինայի Կոռուպցիայի կանխարգելման ազգային գործակալությունը հայտարարեց, որ հունգարական խոշորագույն բանկը ներառել է որպես պատերազմի հովանավոր՝ բանկի ղեկավարության դիրքորոշման պատճառով, քանի որ նա շարունակում է համագործակցել Ռուսաստանի հետ: Հունգարիան չընդունեց մեղադրանքները և ասաց, որ իրենք հնարավորություններ են փնտրում ռուսական շուկայից դուրս գալու համար։
