ԱՄՆ Միջազգային հանրապետական ինստիտուտը՝ IRI-ը, հասարակական կարծիքի հարցում է իրականացրել Հայաստանում 2023-ի հունվարի 23-ից մարտի 4-ն ընկած ժամանակահատվածում դեմ առ դեմ հարցման մեթոդով, հարցվողների տանը։
Եթե խորհրդարանական ընտրություններն անցկացվեին հաջորդ կիրակի, հարցվածների 21%-ն իր ձայնը կտար «Քաղաքացիական պայմանագիր» կուսակցությանը, 4%-ը՝ «Հայաստան» դաշինքին, 3%-ը՝ «Բարգավաճ Հայաստանին», 2%-ը՝ Վարդան Ղուկասյանի (Դոգ) «Հանրային ձայն» կուսակցությանը։
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը «Առաջին լրատվական»-ի հետ զրույցում նշեց, որ այս հարցումների արդյունքները բնավ չեն նշանակում, որ եթե առաջիկա կիրակի օրն ընտրություններ լինեին, ապա այս նույն պատկերը կլիներ, որովհետև ընտրություններն ամեն դեպքում ենթադրում են ակտիվ քարոզարշավ։
«Մենք հիմա տեսնում ենք, որ որոշ ուժեր սկսում են ակտիվ քարոզարշավ, օրինակ՝ «Ապրելու երկիրը», որը թեև այդտեղ չկար, բայց ես վստահ եմ, որ ակտիվ քարոզարշավ իրականացնելու է։ Այս առումով, իրականում, ընդհանուր առմամբ, պատկերը զարմանալի չէր, Վարդան Ղուկասյանը՝ Դոգը, ունի իր հետևորդները, սա ակնհայտ է, և այն չպետք է անտեսել։ Մենք տեսել ենք, թե ինչպես նա սեպտեմբերի 14-ին Հանրապետության հրապարակում կարողացավ նույնիսկ հանրահանաք կազմակերպել, և այս առումով զարմանալի բան չկա»,-ասաց Իոաննիսյանը:
Իսկ այն, որ այդ կուսակցությունն առաջ է անցել ԲՀԿ-ից, Դաշնակցությունից, ՀՀԿ-ից և այդպես շարունակ, Իոաննիսյանը նշեց, որ այդ ուժերը մեծ հաշվով հանրության շրջանում հեղինակություն չեն վայելում։
Անդրադառնալով ՔՊ-ի՝ առաջին հորիզոնականում լինելու հանգամանքին, նա նկատեց, որ այս թիվն իրականում բավականին մեծ է, որովհետև եթե մենք հանենք չկողմնորոշվածներին, նրանց, որոնք ընտրությանը չեն ուզենա մասնակցել, այս թիվը մեծ է լինելու, իսկ սա նշանակում է, որ հանրային վստահություն ունի ՔՊ-ն։
Նշենք, որ վերջին 6 ամիսների ընթացքում Կառավարության ամենամեծ ձախողումը, ըստ հարցման մասնակիցների 15%-ի՝ Լաչինի միջանցքի փակ լինելն է, հետո Ղարաբաղյան հարցի տապալումը և ՀՀ ազգային անվտանգության և սահմանային խնդիրները։
Իոաննիսյանը նշեց, որ իրեն զարմացրել է, որ, օրինակ, իշխանությունների մոտեցումը ղարաբաղյան կարգավորման հարցում ունի շատ չնչին աջակցություն. «Ես այդ տպավորությունը չունեի, զարմացա, բայց ես IRI-ին չվստահելու հիմքեր չունեմ»:
Նա անդրադարձավ նաև Երևանում սպասվող ընտրություններին՝ նշելով. «Երևանի ավագանու ընտրություններում ուժերիհարաբերակցության ձևավորումը դեռ առջևում է, այսինքն՝ հիմնական խաղացողների ձևավորումը դեռ առջևում է»:
Ինչ վերաբերում է հարցումների նկատմամբ վստահությանը, Իոաննիսյանն ասաց. «Հարցումներ պատվիրողների մասով կասկածներ չկան, հարցումները, սակայն բարդ բան են, մենք էլ հարցում պետք է հայտարարենք։ Ինձ թվում է, որ ինչ-որ բաներ միգուցեև այլ կերպ է»:
