«Առաջին լրատվական»-ի զրուցակիցն է Թուրքիայում լույս տեսնող «Ակօս» շաբաթաթերթի հայերեն էջերի խմբագիր Բագրատ Էստուկյանը։
-Պարոն Էստուկյան, թուրքական լրատվամիջոցները գրում են, որ հավանական է մայիսի 14-ին կայանալիք ընտրությունները չավարտվեն մեկ փուլով։ Ի՞նչ դիտարկումներ ունեք, երկրորդ փուլի հավանականություն կա՞։
–Իհարկե կողմերն ամեն ինչ անելու են, որ մեկ փուլով ավարտին հասցնեն պրոցեսը, իսկ եթե չստացվի՝ անշուշտ երկու շաբաթ հետո երկրորդ փուլ կլինի։ Այս պահին քարոզարշավը բուռն կերպով շարունակվում է, երկու հիմնական կողմերը ակտիվ մասնակցություն են ունենում։ Իմ կարծիքով՝ փորձ է արվում ամեն ինչ անել, որ հենց առաջին փուլով ամեն ինչ ավարտվի։
-Հայերն ի՞նչ տրամադրվածություն ունեն։
-Հայ համայնքի մեջ երկու կողմի աջակիցներ էլ կան։ Կան այնպիսիք, որոնք կքվեարկեն ի նպաստ ընդդիմության և նաև այնպիսիք,որոնք իշխանության կողմնակից են։ Մեծամասնությունը հավանաբար ընդդիմության կողմնակից կլինի։
-Պուտինի տեսակապով ունեցած ելույթը, Ալիևի գալը ուժեղացրի՞ն Էրդողանի դիրքերը։
-Չենք կարող ասել, որ իրավիճակ փոխվեց, բայց հնարավոր է և որոշակի ազդեցություն ունեցած լինի։ Անցյալում մենք նմանատիպ բաներ տեսել ենք Մերկելի այցելությունների հետ կապված։ Ընտրություններից առաջ Մերկելը սովորություն էր դարձրել Էրդողանին այցելելը, ինչը որոշակիորեն զորակցություն նշան էր համարվում։ Այս անգամ էլ, գուցե որոշ նպաստ լինի, բայց որ ասենք ընդհանուր ընթացքը կփոխվի՝ մեծ ակնկալիքներ ունենալ պետք չէ։ Կարծես Էրդողանը ևս հասկանում է, որ այս ընտրություններն իր համար ճակատագրական են լինելու և շատ վիճալի՝ արդյոք կկարողանա շարունակել, թե՞ ոչ։
-Իսկ շանսերը մե՞ծ են։
-Ո՛չ, ընդհակառակը։ Իր շանսերը մեծ չեն, նախորդ բոլոր ընտրությունների ժամանակ նա շատ ավելի բարձր շանսեր ուներ։
-Կարծում եք Հայաստանի, հայ-թուրքական հարաբերությունների առումով ինչ-որ բան կփոխվի՞, եթե Էրդողանը պարտվի։
-Չեմ կարծում, որ Հայաստանի, հայ-թուրքական հարաբերությունների իմաստով շատ բան կփոխվի։ Հայաստանի հետ հարաբերություններն ավելի շատ պետական քաղաքականության բնույթ ունեն, ոչ թե կոնկրետ կառավարության դիրքորոշում են։
