Էլեկտրատեխնիկայի վաճառքով զբաղվող ընկերություններից մեկն այս տարվա առաջին եռամսյակի ցուցանիշով Հայաստանի խոշոր հարկատուների առաջատար հնգյակում է, որը պայմանավորված է այս ապրանքների՝ դեպի Ռուսաստան վերաարտահանմամբ։ Նշվում է, որ սա կարող է խնդիրներ առաջացնել Արևմուտքի հետ հարաբերություններում և որ սա կարող է դուր չգալ Արևմուտքին։
tvyal.com կազմակերպության ղեկավար, Ամբերդ հետազոտական կենտրոնի փորձագետ Աղասի Թավադյանը «Առաջին լրատվական»-ի հետ զրույցում, անդրադառնալով խնդրին, նշեց, որ Հայաստանի ամենախոշոր սմարթֆոններ ներկրողը 2022-ի ընթացքում չորս անգամ ավելի շատ հարկ է վճարել, և եթե 2021-ին զբաղեցնում էր 42-րդ տեղը 1000 խոշոր հարկատուների ցանկում, ապա 2022-ին զբաղեցնում է 7-րդ տեղը։
Նույնը վերաբերում է խոշոր էլեկտրատեխնիկա վաճառողներից մեկին, որը 2022-ի ընթացքում մոտ հինգ անգամ ավելի շատ հարկ է վճարել և հայտնվել 22-րդ տեղում հարկ վճարողների ցանկում. «Պետք է նշել, որ տվյալ կազմակերպության համար աճի միտում կա 2023-ին, բայց մյուս երկու խոշոր էլեկտրատեխնիկա վաճառողները համեմատաբար դիրքերը չեն փոխել տարիների ընթացքում, այսինքն՝ իրենց սարքերի վաճառքն անպասելիորեն չի աճել։ Սա նաև պայմանավորված է նրանով, որ եթե նայում ենք հարկերի կառուցվածքը, ամենաշատը այս կազմակերպություններն են ԱԱՀ վճարում։ Պետք է նաև նշել, որ ըստ պաշտոնական տվյալների՝ մինչև 2022-ը Հայաստանից չի արտահանվել գեթ մեկ սմարթֆոն: 2022-ին բավականին մեծ աճ է տեղի ունեցել տեխնիկայի և ավտոմեքենաների արտահանման։ Տվյալ արտահանումը ավելի քան տասն անգամ աճել է մեկ տարվա ընթացքում: Մեծ քանակությամբ մոնիտորներ, կենցաղային տեխնիկա, ավտոմեքենաներ և այլ նմանատիպ պարագաներ ենք արտահանել կամ վերաարտահանել ՌԴ։ Եվ այս ապրանքները կազմել են մեր 5,5 միլիարդ արտահանման մեկ հինգերորդ մասը»,-ասաց տնտեսագետը:
Ինչ վերաբերում է պատժամիջոցներին, ապա, Թավադյանի խոսքով, իհարկե, սա կարող է հանգեցնել որոշակի պատժամիջոցների, որոնք կարող են տարածվել Հայաստանի վրա, բայց սա սցենարներից մեկն է, որը ունի հավանականություն։ «Փոխարենը, վերարտահանման այս միտումը բավականին դրական է անդրադարձել Հայաստանի զարգացման վրա։ Ավելին, մենք վերաարտահանման առումով արգելքներ չունենք, դա պաշտոնապես գրանցվում է որպես արտահանում, բայց հասկանում ենք, որ ներմուծվում է տվյալ կազմակերպությունների միջոցով, մի բեռնատարից մյուս բեռնատար է տեղափոխվում և վերաարտահանվում Ռուսաստան»:
Հարցին, թե դեռ որքան կշարունակվի այս միտումը, Աղասի Թավադյանը պատասխանեց, որ դա կախված է ռուս-ուկրաինական պատերազմի շարունակականությունից. «Ռուսաստանին դժվար է տեխնիկա ներմուծել, և դրանց մեծ մասը հիմա սկսել է գալ Հայաստանով։ Այս տարվա երեք ամիսների ընթացքում ռուսական ռուբլին բավականին արժեզրկվել է դրամի համեմատ, որը դժվարացնում է արտահանումը Հայաստանից Ռուսաստան, ընդ որում, ոչ միայն տեխնիկայի, այլ նաև այլ ապրանքների: Նշեմ, որ մեր արտահանման 41 տոկոսն այս պահին գնում է ՌԴ, և փոխարժեքի այս անկումը 2023-ին որոշակի դժվարություններ է ստեղծում, քանի որ այստեղից Ռուսաստան գնացող ապրանքը թանկացել է փոխարժեքի պատճառով: Սա է իրենց հիմնական խնդիրը»:
