Ռուսական օկուպացիոն ուժերի կողմից Դնեպրոպետրովսկի շրջանի ռմբակոծությունը հանգեցրել է զոհերի։ Ըստ ուկրաինական լրատվամիջոցների՝ ռուս զինվորականները ծանր հրետանիով հարձակվել են Նիկոպոլ քաղաքի վրա։ Ռմբակոծության հետեւանքով մեկ մարդ զոհվել է, երկուսը՝ վիրավորվել։ Վնասվել են բազմահարկ շենքեր և առանձնատներ, ինչպես նաև գազատարներ և էլեկտրահաղորդման գծեր։
Մայիսի 1-ի լուսադեմին Ուկրաինայի տարածքում լայնածավալ օդային տագնապի մասին է հայտարարվել։ Ուկրաինայի նախագահի վարչակազմը տեղեկատվություն է հրապարակել ռուսական հրթիռների չեզոքացման հակաօդային պաշտպանության համակարգի գործունեության մասին։ Մի քանի շրջաններում ուժգին պայթյուն է լսվել: Ըստ տեղեկությունների՝ ռուս զինվորականները 50 անգամ կրակ են բացել Սումիի շրջանի բնակավայրերի ու մարտական դիրքերի ուղղությամբ։
Լրատվամիջոցների տվյալներով՝ անցած ցերեկ ու գիշեր ուկրաինացի զինվորականները երեք ավիահարված են հասցրել ռուս օկուպանտների կենտրոնացման գոտիներին։ Ուկրաինական հրետանային և հրթիռային ստորաբաժանումները ռմբակոծել են նաև ռուսական օկուպացիոն ուժերի սպառազինության և կենդանի ուժի կենտրոնացման չորս շրջաններ։ Ուկրաինական բանակի գլխավոր շտաբի տեղեկատվության համաձայն՝ ռազմական գործողությունների էպիկենտրոնում շարունակում են մնալ Բախմուտ և Մարինկա քաղաքները։