Հանրային հեռուստառադիոընկերության խորհրդի նախագահ Ալեքսան Հարությունյանն այսօր տեղեկացրեց, որ Հանրային հեռուստաընկերության հաղորդավար, «Բանաձև» նախագծի ղեկավար Արտակ Ալեքսանյանը առաջարկ է ստացել ղեկավարելու «Արմնյուզ» հեռուստաընկերությունը, և ինքն իր համաձայնությունը տվել է, քանզի համարում է, որ դա կարիերայի առաջընթաց է:
Հարությունյանը, սակայն, նկատեց, որ, ամենայն հավանականությամբ, Ալեքսանյանի նախագիծը կմնա Հանրայինի եթերում, և նրա թիմը կշարունակի աշխատել:
Հանրային հեռուստառադիոընկերության խորհրդի նախագահը նաև անդրադարձավ այն տեղեկություններին, թե Հանրային հեռուստաընկերության «Երևան» հեռուստաֆիլմերի ստուդիայի տնօրեն Լևոն Գալստյանը կազատվի աշխատանքից Հանրայինի տնօրեն Գագիկ Բունիաթյանի հետ ծագած խնդիրների պատճառով: Հարությունյանը նշեց, որ ինքը ևս մամուլից է կարդացել այդ տեղեկատվությունը, և կփորձի հասկանալ, թե դա ինչ տեղեկություն է. «Լևոն Գալստյանը աշխատում է մեզ մոտ, «Երևան» ստուդիայի ղեկավարն է, և չեմ կարծում, որ ինչ-որ խնդիրներ կան: «Երևան» ստուդիան ինքնուրույն միավոր չէ, այլ Հանրային հեռուստաընկերության բաժիններից է, և այնտեղ մեծ աշխատանքներ են տարվում հին ֆիլմերը թվայնացնելու ուղղությամբ: Ամեն դեպքում, Լևոն Գալստյանի հետ ոչ ես, ոչ մեր համակարգում որևէ մեկը որևէ խնդիր չունենք: Հեռացվելու հավանականություն չկա»:
Wikileaks-յան հրապարակումներում իր անվան առկայության փաստին անդրադառնալով՝ Ա. Հարությունյանը նշեց, որ դրանց վերաբերյալ որևէ մեկնաբանություն չունի. «Դա ամերիկյան տարբեր դիվանագետների կարծիքներն են, և ես չեմ ցանկանում մեկնաբանել, մանավանդ՝ տարիներ առաջ տարածված ինֆորմացիան: Եթե դա վերաբերեր իմ այսօրվա գործունեությանը, բնականաբար, կփորձեի որոշ մեկնաբանություններ տալ»:
