Հայաստանի ԱԽ քարտուղարը ֆեյսբուքյան իր էջում հայտնել է Իրանի անվտանգության խորհրդի քարտուղար Ալի Շամխանիի հետ Թեհրանում ունեցած աշխատանքային ընթրիքի մասին, որի ընթացքում քննարկվել են թե ռեգիոնալ անվտանգության վիճակին, թե հայ-իրանական երկկողմ հարաբերությանն առնչվող հարցեր: Հայաստանի ԱԽ քարտուղար Գրիգորյանի Իրան կատարած այցի ընթացքում Իրանի ԱԽ քարտուղարի հետ հանդիպման աշխատանքային ընթրիքի ձևաչափը թերևս հայ-իրանական հարաբերության ջերմության հաղորդագրություն է, որով ընդգծվում է, որ երկու երկրների փոխհարաբերությունը բացի պաշտոնական միջպետական հանգամանքից, պարունակում է նաև մարդկային շփումների որոշակի ջերմ աստիճան: Այդ հանգամանքը ընդգծվում է նաև ադրբեջան-իրանական հարաբերության լարվածության ֆոնին:
Ի դեպ, Հայաստանի ԱԽ քարտուղարի թեհրանյան աշխատանքային ընթրիքին «զուգահեռ», հեռախոսազրույց է տեղի ունեցել Իրանի արտգործնախարար Աբդոլահիանի և Բաքվի նախարար Բայրամովի միջև: Աբդոլահիանը Բայրամովին ասել է՝ Իսրայելի մասին խոսելով, որ ռեգիոնալ վեճերից կշահեն միայն թշնամիները: Բաքուն հազիվ թե համաձայն լինի այն մտքին, թե Իսրայելը թշնամի է: Միևնույն ժամանակ, հազիվ թե լինի ի դեմս Իրանի թշնամի ունենալու ցանկություն: Բայց, Իրանի հարցում հաջող առևտուր անելու ցանկությունից Ադրբեջանն իհարկե չի հրաժարվի:
Այլ հարց է, որ այդտեղ Բաքվի համար իրավիճակը շատ նուրբ է և պահանջելու է գերկառավարելիություն՝ մի կողմից լարվել Իրանի հետ, մյուս կողմից՝ չթնշամանալ և թույլ չտալ, որ լարվածությունն անցնի թշնամության սահմանը: Այդ իրավիճակը Հայաստանի համար մի կողմից շահեկան է, քանի որ այդ կերպ զսպվում է լայնածավալ ագրեսիայի ռիսկը, մյուս կողմից սակայն, առաջանում է ռիսկ, որ իրան-ադրբեջանական թշնամություն թույլ չտալու հարցում կարող է լինել Իրան-Ադրբեջան համաձայնություն, որտեղ պահպանվեն Իրանի հայտարարածխ ռեգիոնալ սահմանների անխախտության կարմիր գծերը, սակայն «խախտվեն» գծեր, որոնք կենսական ու մուգ կարմիր են Հայաստանի համար: Այստեղ է, որ կարևոր է հայ-իրանական հարաբերության ինտենսիվացումը, որպեսզի ադրբեջանա-իրանյան հարաբերության կառավարումը չպարունակի Հայաստանի հաշվին բաղադրիչներ:
