ՌԴ ԱԳ նախարար Սերգեյ Լավրովի խոսքով՝ բանակցությունների ընթացքում պետք է խոսել այն սկզբունքների մասին, որոնց վրա պետք է հիմնվի նոր աշխարհակարգը։ Նշված հայտարարությունն արել է Սերգեյ Լավրովը Թուրքիա կատարած այցի ժամանակ, որտեղ հանդիպել է իր թուրք գործընկեր Մևլութ Չավուշօղլուի հետ։
Ռուսաստանի արտաքին գործերի նախարարը, մասնավորապես, պատասխանել է լրագրողի հարցին՝ կապված ապրիլի վերջին Նյու Յորքում Լավրովի եւ ԱՄՆ պետքարտուղարի հնարավոր հանդիպման հետ։
Լավրովի խոսքով՝ Ռուսաստանը դեմ է միաբևեռ աշխարհին, որը ղեկավարում է մեկ հեգեմոն։
«Ցանկացած բանակցություն պետք է հիմնված լինի Ռուսաստանի օրինական շահերի, Ռուսաստանի մտահոգությունների վրա։ Հետևաբար, երբ որոշ միջազգային փորձագետներ, այս կամ այն երկրի ներկայացուցիչներ, փորձում են հանդես գալ միտված նախաձեռնությամբ, եկեք հիմա Ռուսաստանին դնենք բանակցային սեղանի շուրջ, ապա սա ախտանիշ է այն իրավիճակի, որը ստեղծվել է ԱՄՆ-ի որդեգրած գծի արդյունքում, որն ուղղված է միջազգային հարաբերություններում ԱՄՆ-ի լիակատար հեգեմոնիայի հաստատմանը։ Խոսակցությունը պետք է լինի նոր աշխարհակարգի սկզբունքների մասին, որոնք մեզ բոլորիս պետք են՝ մեկ հեգեմոնի միաբևեռ աշխարհակարգի փոխարեն»,- ասել է Լավրովը։
Ինչպես հայտնի է, Թուրքիայում ընթացող բանակցություններում քննարկվելիք հիմնական հարցերից է «հացահատիկի պայմանագիրը»: Մոսկվայի կարծիքով՝ այս պայմանավորվածությունը չի կատարվում։