Վաղը կմեկնարկի «Մասնագիտությունը հեռանկարում» միջազգային համաժողովը: Այս մասին այսօր լրագրողների հետ հանդիպման ժամանակ նշեց ՀՀ քաղծառայության խորհրդի նախագահ Մանվել Բադալյանը: «Սա թվով հինգերորդ միջազգային համաժողովն է, որին մասնակցելու են հանրային ծառայողներ՝ տասնվեց երկրներից: Հայաստանում համաժողովն իրականացնելու որոշումը կայացվել է անցյալ տարի՝ Իռլանդիայում»,- տեղեկացրեց Մ. Բադալյանը` միջոցառումը համարելով խորհրդանշական, քանի որ այս տարի «Քաղծառայության մասին» ՀՀ օրենքը նշում է իր տասնամյակը:
Բանախոսը նաև նշեց, որ կոնֆերանսում քննարկվելու են քաղծառայության ոլորտի խնդիրները, քանի որ, նրա համոզմամբ, մեր երկրում այն ամուր հիմքի վրա չէ: «Քաղծառայողը չպետք է լինի անկիրթ, գռեհիկ, մեծամիտ: Ես սա ասում եմ, որպես ՀՀ քաղաքացի և պետական պաշտոնյա»,- ասաց խորհրդի նախագահը` հույս հայտնելով, որ այս կերպ համակարգն առավել արդյունավետ կդառնա:
Անդրադառնալով քաղծառայության համակարգի խնդիրներին` Մ. Բադալյանն առաջինն առանձնացրեց ցածր վարձատրությունը, իսկ երկրորդը` մտածելակերպը: «Կան մարդիկ, ովքեր ունեն լավ մարդկային և մասնագիտական որակներ, բայց չեն կարողանում այս աշխատանքը կատարել»,- մեկնաբանեց բանախոսը: Քաղծառայության խնդիրների շարքին դասեց նաև կուսակցականության խնդիրը`նշելով, որ այս բնագավարում աշխատող մասնագետը չպետք է կուսակցական հակվածություն ունենա:
Մ. Բադալյանը նաև շեշտեց, որ խորհուրդը չի աջակցելու այն մարդկանց, ովքեր ղեկավարության ճնշումների ազդեցությամբ հեռանում են աշխատանքից: «Ես չեմ կարող և ցանկություն չունեմ աջակցելու այս մարդականց, որովհետև, եթե մարդն ինքն իր շահը չի պաշտպանում, մենք դա չենք կարող անել: Իսկ երբ մարդն ինքն է վիճարկում իր տնօրինության որոշումը, մեր խորհուրդը օգնում է` ներկայացնելով բավարար և սպառիչ հիմքեր»,- հայտարարեց Մ. Բադալյանը:
