Թուրքական Zaman թերթի փոխանցմամբ՝ «Ազգայնական շարժում» կուսակցության (ԱՇԿ) խորհրդարանական խմբակցության ղեկավար Օքթայ Վուրալը Թուրքիայի Ազգային մեծ ժողովում (ԹԱՄԺ) հայտարարել է, որ Թուրքիան ուշացել է Իսրայելին առնչվող պատժամիջոցների կապակցությամբ.
«Թուրքիայի վարչապետ վարչապետ Էրդողանն ուշադրության չէր արժանացրել ԱՇԿ նախագահ Դևլեթ Բահչելիի առաջարկները, որը պահանջում էր ավելի շուտ հետ կանչել սեփական դեսպանին և խզել Իսրայելի հետ հարաբերությունները։ Այդ առաջարկներն իրագործվեցին միայն 1.5 տարի անց։ Դրանից ո՞վ և ի՞նչ շահեց՝ թող այդ մասին մտածի իշխող «Արդարություն և զարգացում» կուսակցությունը (ԱԶԿ)»։
Վուրալը նաև մեկնաբանել է Էրդողանի՝ Գազայի հատված այցելելու մտադրությունը՝ հանդես գալով ուշագրավ առաջարկով. «Ես Էրդողանին առաջարկում եմ Գազա այցելել ծովային ճանապարհով։ Քանի որ Թուրքիան չի ճանաչում Գազայի հատվածի ծովային շրջափակումը՝ դրա միջազգային ջրեր լինելու պատճառով, թող վարչապետը Գազա մեկնի ծովային ճանապարհով»։
Հիշեցնենք՝ ավելի վաղ նշվում էր, որ Էրդողանը Գազա է մտնելու ցամաքային ճանապարհով՝ եգիպտական «Ռաֆահ» անցակետով։
