Ո՞ւր կարող է հասնել պետական պաշտոնյայի ցինիզմը: Դժվար է ասել, բայց մինչև Հրազդանի կիրճ այն կարող է հասնել հաստատ: Այդ կիրճում կառուցվող «Ֆլորենցիա» ռեստորանային համալիրի մասին մենք և մամուլի այլ միջոցներ արդեն հայտնել ենք: Հայտնել ենք նաև, որ այն պատկանում է Երևանի քաղաքապետ Կարեն Կարապետյանին, ով ընկած մարդկանց կրպակներն է քանդում և բացօթյա առևտրով զբաղվողներից է Երևանն ազատում` կտրելով նրանց օրվա հաց վաստակելու հնարավորությունից: Իսկ ինքը հացի օբյեկտ է կառուցում առանց այդ էլ օբյեկտախեղդ Հրազդանի կիրճում:
Եվ ահա Կարեն Կարապետյանը երկարատև լռությունից հետո վերջապես խոստովանեց, որ այդ օբյեկտը իրենն է: «Մեդիամաքսին» տված հարցազրույցում նա ասում է, որ ինքը ընկերների հետ է կառուցում այդ ռեստորանը և իր արածից չի ամաչում: Դե իհարկե: Եթե մարդը չի ամաչում այլ մարդկանց հացից զրկելուց և դրա անունը առանց ամաչելու «դրայվ» է դնում, ինչու նա պետք է ամաչի ռեստորան կառուցելուց: Այդ ե՞րբ է իշխանությունն ինչ-որ բանից ամաչում, որ Կարեն Կարապետյանն էլ ամաչի իր արածից: Չէ՞ որ նա իշխանություն է, սովորական հայկական իշխանություն, ուղղակի «Գազպրոմի» կնիքով և քաղաքակիրթ ֆասադով, որին Նարեկ Սարգսյանն առայժմ ձեռք չի տվել:
Իսկ ֆասադի տակ մոտավորապես այն է, ինչ Կարեն Կարապետյանը փորձում է քողարկել երևանյան շենքերի գունավորվող կամ լվացվող ֆասադների տակ` շենքերի հնությունն ու դրանց ենթակառուցվածքների վտանգավորության աստիճանի հնամաշությունը: Նույնկերպ է իր քաղաքակիրթ ֆասադի տակ. ինչպես պարզվում է, Կարեն Կարապետյանը քողարկում կամ թաքցնում է սովորական հնամած և հանրության ու պետության համար վտանգավոր դարձած պաշտոնյայի կերպարը, որն արդեն այնքան թքած ունի հասարակական կարծիքի վրա, որ մարդկանց մի հոծ խմբի զրկելով հացի փողից` առանց ամաչելու հայտարարում է, թե ռեստորան եմ կառուցում, լավ եմ անում, բաշարում եք, դուք էլ արեք:
Ահավասիկ նոր Երևանը, որը թքած ունի երևանցիների վրա, և միայն փողն է, որ հարգի է այդ նոր Երևանում: Նախկին քաղաքապետ Գագիկ Բեգլարյանին պաշտոնից հեռացրին նախագահականի արարողակարգի աշխատակցին ապտակելու համար: Իսկ ո՞վ է հեռացնելու երևանցիներին ապտակած Կարեն Կարապետյանին: Թե՞ երևանցիները նախագահականում էլ արժեք չունեն: