Ամերիկուհի Սոնյա Թոմասը` «Սև այրի» մականունով, գերազանցել է անցյալ տարի իր սահմանած ռեկորդը՝ 12 րոպեում ուտելով 183 հատ հավի թևիկ: Այս մասին հաղորդում են ամերիկյան լրատվամիջոցները:
Կծու թևիկներ ուտելու 10-րդ ազգային փառատոնին, որը տեղի է ունեցել անցյալ կիրակի Բաֆըլոյում (Նյու Յորքի նահանգ), 43-ամյա Թոմասն առաջ է անցել իր գլխավոր մրցակից, «Ծնոտ» մականունով Ջոուի Չեսնաթից: Վերջինս զբաղեցրել է պատվավոր երկրորդ տեղը` ուտելով 174 հատ թևիկ: Անցյալ տարվա նմանատիպ մրցության ժամանակ «Սև այրին», որն ընդամենը 45 կգ է կշռում, կարողացել է ուտել 181 հատ թևիկ:
Մրցույթի մասնակիցը, որը ԱՄՆ-ում տարածում գտած՝ արագ ուտելու մրցույթների «աստղերից» մեկն է, որպես մրցանակ ստացել է 1,500 դոլար: Փխրուն Թոմասը կիսվել է մրցույթին պատրաստվելու իր գաղտնիքով: Նրա խոսքերով` որպեսզի միշտ լինես ճիշտ մարզավիճակում, պետք է ուտել շատ թարմ միրգ, բանջարեղեն և զբաղվել սպորտով: