Թուրքական Milliyet թերթի փոխանցմամբ՝ այսօր առավոտյան Թուրքիայի ռազմաօդային ուժերը հարվածներ են հասցրել Թուրքիայի, Իրանի և Իրաքի սահմանային եռանկյունում ընկած Հաքուրքի, ինչպես նաև Սիդեքանի, Սինինի, Լոլանի շրջաններին, ուր գտնվում են Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) ճամբարները։
Իրաքի նախագահ Ջելալ Թալաբանիի տեղեկություններով՝ թուրքական ռազմաօդային ուժերը մեկ ժամով խախտել են Իրաքի օդային սահմանը և ռմբակոծություններ իրականացրել։ Թուրքական ավիացիան իրականացրել է նաև հետախուզական թռիչքներ։
Նշվում է, որ թուրքական ավիացիոն ռմբակոծությանը ենթարկված վերոնշյալ շրջանները գտնվում են այն տեղանքին անմիջականորեն մոտ, ուր Իրանը հակաահաբեկչական գործողություններ է իրականացնում PKK-ի իրանական թև հանդիսացող PJAK-ի («Քրդստանի ազատ կյանք» կուսակցություն) դեմ։ Հյուսիսային Իրաքում թուրքական ավիացիոն ռմբակոծություններին զուգահեռ՝ Իրանը Ղանդիլի լեռներում ցամաքային հարձակում ու գործողություններ է իրականացնում PJAK-ի դեմ։
Հիշեցնենք, որ երեկ PKK-ն սպառնացել էր հարձակումների ուժեղացման պարագայում պատերազմ սկսել Իրանի դեմ։ Ավելի վաղ PKK-ն խոստացել էր թուրքական ավիացիոն ռմբակոծությունների շարունակման պարագայում պատերազմ հայտարարել Թուրքիային։
