Շվեդիայի վարչապետը ողջունել է Թուրքիայի արտգործնախարար Մևլութ Չավուշօղլուի հայտարարությունը ՆԱՏՕ-ին անդամակցելու հայտի շուրջ իր երկրի բանակցությունների վերաբերյալ, որոնք դադարեցվել էին Թուրքիայի կողմից՝ եռակողմ համաձայնագրի պայմանները չկատարելու պատճառով։
«Ես, իհարկե, ողջունում եմ Թուրքիայի հայտարարությունը, որ նրանք ցանկանում են վերսկսել քննարկումները Շվեդիայի, Թուրքիայի և Ֆինլանդիայի հետ եռակողմ համաձայնագրերի վերաբերյալ», – երկուշաբթի օրը կայացած մամուլի ասուլիսում ասել է վարչապետ Ուլֆ Քրիստերսոնը։
Երկուշաբթի ավելի վաղ Չավուշօղլուն հայտարարել էր, որ Շվեդիայի՝ ՆԱՏՕ-ին անդամակցելու շուրջ բանակցությունների վերսկսումը կախված է երկրի ձեռնարկած քայլերից։
«Շվեդիան մի քանի դրական մեսիջներ է տվել։ Նրանք փոփոխություններ են կատարել օրենքում և սահմանադրության մեջ, բայց, ցավոք, մենք հստակ տեսնում ենք, որ քրդական ահաբեկչական խմբավորման կողմնակիցները շարունակում են տարբեր դիվերսիոն գործողություններ՝ ներառյալ ահաբեկչության ֆինանսավորումը, ահաբեկիչների հավաքագրումը և ահաբեկչության քարոզչությունը», – ասել է Չավուշօղլուն։
Նա նշել է, որ ահաբեկիչների նպատակն է կասեցնել Շվեդիայի անդամակցությունը ՆԱՏՕ-ին, սակայն Շվեդիան իրավունք ունի կանխելու նման գործողությունները։