Հրապարակախոս Հրանտ Տեր-Աբրահամյանը ֆեյսբուքյան իր էջում գրել է.
Առաջին նախագահի մամլո խոսնակ Արման Մուսինյանն այսօր անդրադարձել է «Քաղաքական տեսություն» իմ հաղորդաշարի վերջին հաղորդմանը, պնդելով, թե ես իբր «բացարձակ կեղծիք» եմ թույլ տվել, երբ հաղորդման ընթացքում ասել եմ, որ 1997-ին Տեր-Պետրոսյանը կողմ է արտահայտվել ռուսական ուժերի տեղակայմանն Արցախում:
Ցավ ի սիրտ, պետք է հայտնեմ, սակայն, որ Առաջին նախագահի գրասենյակը չարաչար սխալվում է, և մեղմ ասած անհարմար դրության մեջ է գցում իրեն:
Այսքան տարի ինձ ճանաչելով, կարելի էր հասկանալ, որ ես իմ հրապարակային խոսքում շրջահայաց եմ, և գիտեմ ե՛րբ և ի՛նչ եմ ասում ու ինչի՛ համար:
Խնդիրն այն է, որ այս հարցում պարոն Մուսինյանը պետք է հերքի ոչ թե ինձ, այլ ԱՄՆ Պետդեպին և այն ժամանկվա ԱՄՆ Պետդեպի քարտուղար՝ Մադլեն Օլբրայթին:
Եվ սա այն պարզ պատճառով, որ իմ խոսքն ընդամենը հղում էր Պետդեպի գաղտազերծված փաստաթղթերից մեկին: Դրա հղումը ես կդնեմ մեկնաբանության մեջ, իսկ այստեղ պատճենեմ խնդրո առարկա հատվածը բնագրով:
THE SECRETARY AND CHIRAC BRIEFLY REVIEWED
NGORNO-KARABACH, AGREEING THE DECISION TO ESTABLISH A
MINSK GROUP TRI-CHAIR WAS A GOOD ARRANGEMENT. CHIRAC
SAID HE HAD SEEN AZERI PRESIDENT ALIYEV RECENTLY, AND
HAD URGED HIM TO WORK FOR AN AGREEMENT ON
NGORNO-KARABACH, SUGGESTING FULL AUTONOMY WITH
INTERNATIONAL MILITARY TROOPS TO OFFER SECURITY. HE
CONFIRMED TO THE SECRETARY THIS MEANT UN TROOPS. THE
SECRETARY SAID SHE UNDERSTOOD ARMENIAN PRESIDENT
TER-PETROZIAN WANTED A RUSSIAN TROOP PRESENCE, BUT THIS
COULD BE POSSIBLE WITHIN AN INTERNATIONAL MILITARY
GROUP. FM DE CHARETTE NOTED IT WOULD BE IMPORTANT TO
HAVE TRANSPARENCY WITHIN THE MINSK TRI-CHAIR
Ինչպես տեսնում եք այստեղ պարզ գրված է, որ Ֆրանսիայի նախագահ Շիրակի և ԱՄՆ Պետդեպի քարտուղար Օլբրայթի հանդիպման ժամանակ, նախագահ Շիրակն ասում է, որ ինքը հանդիպել է Հեյդար Ալիևին, և նրանք քննարկել են Ղարաբաղյան խնդիրը, այդ թվում այդտեղ ՄԱԿ-ի զորքերի տեղադրումը: Ընդ որում՝ հատուկ շեշտվում է, որ Շիրակը հավաստիացնում է Օլբրայթին, որ խոսքը հենց ՄԱԿ-ի զորքերի մասին է:
Սրան ի պատասխան Օլբրայթն ասում է, որ ինքը հասկացել է, թե Հայաստանի նախագահ Տեր-Պետրոսյանն ուզում է ռուսական զորքերի ներկայություն: (Հնարավորինս տառացի եմ թարգմանում, բայց թող անգլերենի գիտակներն ուղղեն, եթե հարկ կա): Դա հնարավոր է, շարունակում է Օլբրայթը միջազգային ուժերի ներքո:
Ի դեպ, ուշագրավ է, որ վերջում Օլբրայթը նշում է, որ կարևոր է, որ Մինսկի խմբում թափանցիկություն լինի: Այսինքն՝ թափանցիկության խնդիր է տեսնում հենց այս կոնտեքստում:
Ինչևէ, նշված հատվածից աներկբայորեն բխում է, որ ըստ Մադլեն Օլբրայթի՝ Հայաստանի նախագահն “ուզեցել է ռուսական զորք”:
Ուղիղ այսքանն էլ անհրաժեշտ է Մուսինյանի հերքումը հերքելու համար:
Եթե այստեղ կա սխալ, ապա առաջին նախագահի մամլո խոսնակի հերքման հասցեատերը պետք է լինի ԱՄՆ Պետդեպի քարտուղարը, բայց ոչ երբեք Հրանտ Տեր-Աբրահամյանը, որն ընդամենը հղում է արել հրապարակված փաստաթղթին: Չգիտեմ ինչու, նման հանրաճանաչ անձնավորությանը հերքելու փոխարեն ընտրել են իմ համեստ անձը:
Ես չեմ պատկերացնում, թե ինչպես այսքանից հետո կարելի է փորձել տակից դուրս գալ, և ինչ որ “փաստարկներ” հորինել, բայց իմ հորդորն է՝ հետայսու լինել ավելի ուշադիր, և ծայրահեղ անհարմար դրության մեջ չընկնել, ու չգցել այդ դրության մեջ այն մի բուռ կողմնակիցներին, որոնք դեռ մնացել են:
Խնդրում եմ նաև հաջորդ անգամ մոտենալ նման խնդիրներին ավելի սթափ, սառնասիրտ, այլ ոչ թե պահի զգացմունքի ազդեցության տակ տալ հերքումներ, որոնք իրենց հերթին այդքան խայտառակ կերպով հերքվում են:
