Հայաստանի արտաքին գործերի նախարար Արարատ Միրզոյանը զանգահարել է Մոսկվա և հեռախոսազրույց ունեցել ՌԴ արտգործնախարար Լավրովի հետ: Հեռախոսազրույցը տեղի է ունենում հայ-ռուսական հարաբերության մեջ ճգնաժամային իրողությունների մասին գնահատականների ֆոնին, որոնց առիթ կամ պատճառ դարձել էին նաև Լավրովի հայտնի հայտարարությունները, որ հնչել են անցնող շաբաթների և անգամ ամիսների ընթացքում, մասնավորապես պայմանականորեն սկսած 2022 թվականի դեկտեմբերի 23-ին Մոսկվայում չկայացած եռակողմ հանդիպումից, երբ Հայաստանի արտգործնախարարը չեղարկել էր Մոսկվայի հանդիպման պայմանավորվածությունը, ասելով, որ Երևանը զբաղված է Լաչինի միջանցքի արգելափակման խնդրով: Միաժամանակ, Երևանն էլ իր հերթին էր բավականին կոշտ արտահայտություններ անում Մոսկվայի ուղղությամբ:
Այդ ամենով հանդերձ, Միրզոյան-Լավրով հեռախոսազրույցի մասին թե Մոսկվայի, թե Երևանի պաշտոնական հաղորդագրություններում նշվում է, որ զրուցակիցները արտահայտել են Երևանի ու Մոսկվայի միջև դաշնակցային հարաբերությունները ամրապնդելու փոխադարձ մտադրություն: Ընդհանրապես, ուշադրության է արժանի, որ հեռախոսազրույցի մասին երկու կողմի պաշտոնական հաղորդագրությունները գործնականում նույնական են: Այդ հանգամանքից զատ, ուշադրության արժանի մյուս պարագան այն է, որ Արարատ Միրզոյանը Սերգեյ Լավրովին զանգահարում է այն ժամանակ, երբ Երևանում է Մինսկի խմբի ՌԴ համանախագահ, Լավրովի հատուկ ներկայացուցչի կարգավիճակ ունեցող Իգոր Խովաևը, որը նախօրեին հանդիպել էր Նիկոլ Փաշինյանի հետ, իսկ հանդիպմանը ներկա էր եղել նաև Արարատ Միրզոյանը:
Ընդ որում, փետրվարի 10-ին հաղորդագրություն տարածվեց Խովաևի և Միրզոյանի առանձին հանդիպման մասին: Հետաքրքիր է, թե արդյո՞ք Արարատ Միրզոյանը մինչ այդ արդեն զանգահարել էր Լավրովին, թե՞ զանգը եղել է Խովաևի հետ հանդիպումից հետո: Բոլոր դեպքերում, այդ հանգամանքը նշանակում է, որ Լավրով-Միրզոյան հեռախոսազրույցը կարող էր անմիջական կապ ունենալ Խովաևի հայաստանյան այցի բովանդակության հետ: Թե ինչպիսին է այն, բարդ է ասել, սակայն Միրզոյան-Լավրով հեռախոսազրույցի հանգամանքը, ինչպես նաև դրա վերաբերյալ պաշտոնական տեքստերի նույնությունը թույլ է տալիս խոսել առնվազն այս պահին, և խովաևվյան այցի բովանդակության հարցում որոշակի նույնական մոտեցման առկայության մասին, ինչը անշուշտ չի երաշխավորում որևէ շարունակություն, եթե հաշվի առնենք և այն, որ Միրզոյան-լավրով հեռախոսազրույցը տեղի է ունենում ոչ միայն Խովաևի Հայաստան այցին զուգահեռ, այլ նաև ԱՄՆ պետքարտուղարի տեղակալ Դոնֆրիդի՝ Ադրբեջանի արտգործնախարարի հետ հեռախոսազրույցին զուգահեռ: Անշուշտ, Միրզոյան-Լավրով հեռախոսազրույցը հազիվ թե շրջանցած լինի Հայաստանի արտգործնախարարի Գերմանիա կատարած այցը, որտեղ նա հանդիպում էր ունեցել Գերմանիայի արտգործնախարար Բերբոկի հետ, որը ՌԴ հանդեպ առավել կոշտ հռետորաբանության կրողներից է:
