Երևանի պետական ճարտարագիտական համալսարանի խորհուրդը ռեկտոր ընտրեց Արա Ավետիսյանին:
Տեղեկացնենք, որ հուլիս ամսին Արա Ավետիսյանը նշանակվել էր ռեկտորի ժամանակավոր պաշտոնակատար: 30 կողմ և 1 դեմ ձայն քվեարկությամբ Արա Ավետիսյանն ընտրվեց Երևանի ճարտարագիտական համալսարանի ռեկտոր:
Նշենք, որ խորհուրդը կազմված է 32 անդամից, որոնցից նիստին ներկա էին 31-ը:
«Առաջին լրատվականի» հետ զրույցում Ա.Ավետիսյանը նշեց, որ պատրաստվում է բարձրացնել համալսարանի կազմակերպչական աշխատանքների արդյունավետությունը: «Պետք է ավելի ռացիոնալ դարձնել գործերի կառավարումը, միջոցների տեղակայումը և օգտագործումը, ուղղակի ավելի արդյունավետ դարձնել աշխատանքները: Այս դեպքւմ մենք ահագին առաջընթաց կունենանք, արդյունքները տեսանելի կլինեն»,- մեկնաբանեց նորընտիր ռեկտորը:
Անդրադառնալով դասախոսական կազմին` հայտնեց, որ լսարան կմտնի միայն պիտանելի և բանիմաց դասախոս: «Այս ամենին զուգընթաց կներգրավվեն ավելի բանիմաց և որակավորում ունեցող դասախոսներ, մրցակցային կլինի դաշտը և հստակ նշված պահանջները, որպեսզի անձնային մոտեցումները բացառվեն, սա էլ կնվազեցնի կոռուպցիոն ռիսկերը»,- եզրափակեց խոսքը Ա.Ավետիսյանը:
