Վաշինգտոնում գտնվող Թուրքիայի արտգործնախարար Ահմեդ Դավութօղլուն «Brookings» ինստիտուտում հանդես է եկել Թուրքիայի արտաքին քաղաքականության վերաբերյալ ելույթով: Նա ընդգծել է, որ տասը տարի առաջ Թուրքիայում հնարավոր չէր խոսել Հայկական հարցի մասին այնպես, ինչպես այսօր է: Բայց նա ցավ է հայտնել, որ Ֆրանսիան ու այլ եվրոպական երկրներ դա չնկատելու են տալիս:
Դավութօղլուն հիշեցրել է, որ թուրքերը հայերի հետ համատեղ հարյուրամյակներ շարունակ ապրել են՝ առանց որևէ լարվածության: Օսմանյան կառավարությունում եղել են հայ նախարարներ, եվրոպական երկրների մայրաքաղաքներում Օսմանյան պետությունը ներկայացրել են հայ դեսպանները: Իսկ 1915-ի Ցեղասպանության վերաբերյալ Դավութօղլուն ասել է. «Մենք չենք ասում` ոչինչ չի եղել: Որոշ բաներ, անշուշտ, եղել են: Բայց մեզ հետ էլ է եղել, բոլորիս հետ: Հիմա վերականգնվելու ժամանակն է: Մենք պատրաստ ենք ամեն ինչ քննարկել»: Ցյուրիխյան արձանագրությունների վերաբերյալ Դավութօղլուն ասել է, որ, ստորագրելով այդ փաստաթղթերը, Անկարան երեք հիմնական նպատակ է ունեցել` կարգավորել հարաբերությունները Հայաստանի ու Թուրքիայի միջև, աշխարհի բոլոր ծագերում բնականոնացնել հայերի ու թուրքերի հարաբերությունները, նպաստել կովկասյան տարածաշրջանում հաստատվելիք կայունությանը: Թուրքիայի ԱԳ նախարարը, հայտնելով իր լավատեսությունը Հայաստանի հետ հարաբերությունների կարգավորման հարցում, նշել է, որ հայ-թուրքական կարգավորմանը զուգընթաց հարկավոր է լուծել հայ-ադրբեջանական հակամարտության:
