«Առաջին լրատվական»-ի զրուցակիցն է ԱՄՆ հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, Հայաստանում ԱՄՆ դեսպանատունը հայտնում է, որ Լաչինի միջանցքի արգելափակումը խոչընդոտում է խաղաղության գործընթացին և խաթարում է միջազգային վստահությունը: Ինչպե՞ս եք գնահատում այս հայտարարությունը, ի՞նչ հետևանքներ կարող է ունենալ։
–Շատ կարևոր եմ համարում, որ ԱՄՆ-ն բարձրաձայն իր կարծիքը հայտնում է։ Դա միայն կարող է օգնել ճանապարհի բացմանը։ Մենք տեսել ենք իրադարձություններ, երբ խնդիրների մասին չեն բարձրաձայնվել ու դա մշտապես վատ հետևանքներ է ունեցել։ Ադրբեջանը պետք է հասկանա, որ իր արարքները արևմուտքում ու աշխարհում տեսանելի է։
-Իսկ խոսքերից ու կոչերից բացի կա՞ն այլ մեխանիզմներ, որով Վաշինգտոնը կարող է դերակատարություն ունենալ ու ազդել իրավիճակի վրա։
-Ներկայացուցիչների պալատի խոսնակը նոր ընտրվեց։ Նախքան ընտրվելը օրենքով որևէ քայլ չէր կարող կատարվել։ Հիմա, երբ խոսնակ է ընտրվել, գործերը կարող են առաջ գնալ։ Ես չեմ կարող ասել, թե ինչի վրա պետք է կենտրոնանան և ինչ պետք է անել, բայց ԱՄՆ ներկայացուցիչների պալատն ու Սենատը արդեն կանցնեն իրենց բնականոն աշխատանքի։ Բնական է սա վերաբերում է ոչ միայն Հայաստանին ու Արցախին, այլ ԱՄՆ-ին առնչվող խնդիրներին, որովհետև կան շատ խնդիրներ, որոնց պետք է հետևեն ու առաջ տանեն։ Կրկնում եմ, խոսնակը նոր է ընտրվել, առաջիկայում ավելի հստակ կլինի։
-Նոր խոսնակը Հանրապետական է, որն ի տարբերություն Դեմոկրատական կուսակցության Հայաստանի խնդիրներով այնքան էլ հետաքրքրված չէ։
-Այո՛, սա խնդիր է և սա նշանակում է, որ մեր բոլորի գործերը բարդանում են։ Մենք պետք է ավելի շատ աշխատենք, որ մեր խնդիրներն առաջ տանենք ու բացատրենք, համոզենք, պահանջենք, որ այդ հարցերը կարևորեն։ Հարցը նաև այն է, որ սա ոչ միայն զուտ հայերի խնդիրն է։ Սպասում ենք նաև, որ ԱՄՆ-ն նոր ԵԱՀԿ Մինսկի խմբի համանախագահ նշանակի։ Իր նշանակումը ևս շատ կարևոր հանգամանք է։ Բնականաբար մեծ սպասելիքներ ունենք նաև նոր համանախագահից։