Սուր շնչառական վարակների տարածմամբ պայմանավորված՝ դպրոցներում դասապրոցեսը վերսկսվել է կանխարգելիչ միջոցառումների ուղեկցությամբ: Այդ ուղղությամբ աշխատանքները պատշաճ կազմակերպելու համար գործող 1400 դպրոց ՀՀ կրթության, գիտության, մշակույթի և սպորտի նախարարությունից ստացել է համապատասխան հանձնարարական: «Արմենպրես»-ի հետ զրույցում ՀՀ կրթության գիտության, մշակույթի և սպորտի նախարարության հանրակրթության վարչության պետ Արսեն Բաղդասարյանը տեղեկացրեց, որ կանխարգելիչ միջոցառումների կարևոր պայման է դպրոց մուտք գործողների ջերմաչափումն ապահովելը:
«Արձակուրդները 3-12-րդ դասարանցիների համար ավարտվել են: Ուսումնական գործընթացը սկսվել է: Դպրոցներին ու մանկապարտեզներին ուղարկվել է շրջաբերական, որի համաձայն, դասերը սկսվելուց առաջ պետք է իրականացնեն ջերմաչափում, բարձր ջերմության կամ սուր շնչառական վարակների ախտանշանների դեպքում աշակերտներին ուղարկել տուն»,-ասաց Արսեն Բաղդասարյանը: Նա տեղեկացրեց, որ բաց թողնված դասերը կլրացվեն, իսկ եթե բացակայությունը երկարաժամկետ է, ապա դասերը կկազմակերպվեն հեռավար:
Նախարարության ներկայացուցիչը վստահեցրեց, որ ջեռուցման հետ կապված խնդիր որևէ դպրոց առայժմ չի բարձրաձայնել: Եթե մինչև ջեռուցման շրջանի մեկնարկը խնդիրներ եղել են, ապա դրանք շատ արագ լուծվել են: Ինչ վերաբերում է դպրոցներում համապատասխան սարքավորումների առկայությանը, կանխարգելիչ միջոցառումների իրականացմանը, ապա Արսեն Բաղդասարյանը նշեց, որ քովիդի համաճարակի պայմաններում ունեցած փորձից ելնելով՝ դպրոցի յուրաքանչյուր աշխատակից գիտի իր անելիքը:
«Բոլոր դպրոցները պատրաստ են նման իրավիճակի: Ինչպես գիտեք, կորոնավիրուսով պայմանավորված, այսպիսի իրավիճակի միջով անցել ենք: Ուսումնական հաստատությունները զինված են անհրաժեշտ պարագաներով»,-ասաց Արսեն Բաղդասարյանը:
«Արմենպրես»-ի նկարահանող խումբն այցելեց Խ. Դաշտենցի անվան թիվ 114 ավագ դպրոց՝ աշխատանքներին տեղում ծանոթանալու: Դպրոցի տնօրեն Ռուզաննա Կոստանյանը նշեց, որ բոլորը տեղեկացված են եղել կանխարգելիչ միջոցառումների ապահովման մասին: Վաղ առավոտից աշխատանքները պատշաճ կազմակերպվել են:
«Վաղ առավոտից բուժքույրը մուտքի մոտ կազմակերպել է բոլոր անհրաժեշտ գործընթացները: Ջերմաչափում իրականացվում է ինչպես աշակերտների, այնպես էլ ուսուցիչների ու մնացած բոլոր աշխատակիցների համար: Քանի որ կորոնավիրուսի համաճարակի ժամանակ մենք արդեն փորձ ձեռք բերեցինք, հետևաբար այսօր շնչառական վարակների ակտիվացմանը շատ արագ կարողանում ենք արձագանքել»,-ասաց դպրոցի տնօրենն՝ ավելացնելով, որ աշխատանքները սահուն ընթացք ունեն:
Դպրոցի պատասխանատուները շտապում են ամբողջացնել տվյալները այցելությունների ու բացակայությունների վերաբերյալ։ Վերջնական թվերը կամփոփվեն օրվա վերջում:
